Toshkent shahar hokimligi qoshidagi egasiz jonivorlarni tutish bo‘yicha mexanizatsiyalashgan otryadning ikki xodimi bo‘ri deb gumon qilingan itni o‘ldirganlikda ayblanib, Yashnobod tuman ma’muriy sudi tomonidan jarimaga tortildi. Bu haqda “Ekolog.uz” xabar berdi.
Ma’lum qilinishicha, qutqaruv xizmatining xodimlari B.Sharapov va A.Mannopovlar “Aviastroitel-1” dahasiga jonivorni ushlash uchun chaqirilgan. Biroq ular aytilgan joyga kelib itni temir armatura bilan vahshiyona tarzda urib o‘ldirishgan. Sudda guvoh sifatida so‘zga chiqqan R.Gayfulin ularning itni urib o‘ldirganlarini tasdiqlagan. Ayblanuvchilar esa assosiz ravishda itni “qutirgan” deb aytgan.
Sud B.Sharapov va A.Mannopovlarni aybdor deb topib, Ma’muriy kodeksning 11-moddasiga binoan ularning har birini eng kam oylik ish haqining uch barobari miqdorida (608190 so‘m) jarimaga tortgan.
“Mehr va oqibat” hayvonlarni himoya qilish jamiyatining direktori Timur Oripovning aytishicha, ishni sudgacha olib borish jarayoni ancha murakkab kechgan.
“Jonivorlarni qiynoqqa soladigan har bir shaxs bilishi kerakki, joriy yilning may oyida Prezident jonivorlarni qiynoqqa solgan shaxslarga nisbatan mas’uliyatni oshirish bo‘yicha qonunni imzoladi. Biz jarimalarni ko‘paytirishga harakat qilamiz va to‘rt oyoqli do‘stlarimizga ozor berganlarni albatta javobgarlikka tortamiz”, —dedi Temur Oripov.
“Hayvonlarni qiynash. O‘ldirish holatlarining guvohi bo‘lsangiz “102” raqamiga, ichki ishlarga telefon qilishingiz yoki Facebook’dagi Mehr va oqibat HHJga yozma murojaat qilishingiz mumkin. Tabiatning bir bo‘lagi bo‘lgan kichik do‘stlarimizning taqdiriga befarq bo‘lmang!”, — deyiladi xabarda.
Izoh (0)