3-avgust kuni O‘zbekiston bo‘ylab aholi orasida sog‘lom turmush tarzini keng targ‘ib etish maqsadida ommaviy salomatlik tadbirlarining navbatdagisi “Sport – sog‘lom hayot kechirishning asosi” shiori ostida o‘tkazildi. Bu haqda “Daryo”ga Sog‘liqni saqlash vazirligi matbuot xizmati ma’lum qildi.
Jumladan, Toshkentning Mirobod tumanida joylashgan “Mehrjon” bog‘ida ham 5 kilometrga faol yurish va gimnastika mashg‘ulotlari amalga oshirildi.
Jahon sog‘liqni saqlash tashkiloti tomonidan kamharakatlilik oqibatida kelib chiqayotgan ko‘plab kasalliklarning oldini olishda jismoniy faollik, jumladan, kuniga 10000 qadam yurish tavsiya etilmoqda. Buni amalga oshirishda zamonaviy texnologiyalardan unumli foydalanish mumkin. Mobil telefondagi ilova yoki fitnes soati qadamni hisoblab beradi. Agar fitnes soati dastur menyusiga qaralsa, kuniga 8000-10000 qadam tashlash bo‘yicha tavsiyalarni ko‘rish mumkin.
Yurish barcha sport turlari orasida eng osoni va qulayidir. Buning uchun juda ko‘p energiya sarflashning hojati yo‘q, ijobiy ta’siri esa juda yuqori.
Mutaxassislarning ma’lum qilishicha, haftada atigi 2,5 soatlik jismoniy faollik erta o‘lim holatlarini 28 foizga, yurak kasalliklarini ehtimolini esa 20 foizga kamaytirar ekan. Ya’ni, haftada kamida 150 daqiqa jismoniy faol bo‘lgan insonlar kamroq harakatlanadiganlarga qaraganda sog‘lomroq ekan. Gimnastika mashqlari ham salomatlik uchun foydali bo‘lib, uning natijasida mushak tizimini mustahkamlanadi, bo‘g‘imlar harakati yaxshilanadi.
Izoh (0)