3 август куни Ўзбекистон бўйлаб аҳоли орасида соғлом турмуш тарзини кенг тарғиб этиш мақсадида оммавий саломатлик тадбирларининг навбатдагиси «Спорт – соғлом ҳаёт кечиришнинг асоси» шиори остида ўтказилди. Бу ҳақда «Дарё»га Соғлиқни сақлаш вазирлиги матбуот хизмати маълум қилди.
Жумладан, Тошкентнинг Миробод туманида жойлашган «Меҳржон» боғида ҳам 5 километрга фаол юриш ва гимнастика машғулотлари амалга оширилди.
Жаҳон соғлиқни сақлаш ташкилоти томонидан камҳаракатлилик оқибатида келиб чиқаётган кўплаб касалликларнинг олдини олишда жисмоний фаоллик, жумладан, кунига 10000 қадам юриш тавсия этилмоқда. Буни амалга оширишда замонавий технологиялардан унумли фойдаланиш мумкин. Мобил телефондаги илова ёки фитнес соати қадамни ҳисоблаб беради. Агар фитнес соати дастур менюсига қаралса, кунига 8000-10000 қадам ташлаш бўйича тавсияларни кўриш мумкин.
Юриш барча спорт турлари орасида энг осони ва қулайидир. Бунинг учун жуда кўп энергия сарфлашнинг ҳожати йўқ, ижобий таъсири эса жуда юқори.
Мутахассисларнинг маълум қилишича, ҳафтада атиги 2,5 соатлик жисмоний фаоллик эрта ўлим ҳолатларини 28 фоизга, юрак касалликларини эҳтимолини эса 20 фоизга камайтирар экан. Яъни, ҳафтада камида 150 дақиқа жисмоний фаол бўлган инсонлар камроқ ҳаракатланадиганларга қараганда соғломроқ экан. Гимнастика машқлари ҳам саломатлик учун фойдали бўлиб, унинг натижасида мушак тизимини мустаҳкамланади, бўғимлар ҳаракати яхшиланади.
Изоҳ (0)