Mo‘ynoq tumani hududidagi yirik ko‘llarda sodir bo‘lgan yong‘inlardan so‘ng Mo‘ynoqda Yong‘in xavfsizligi xodimlari tomonidan “Yong‘in o‘chirish qayig‘i” yaratildi. Bu haqda O‘zA xabar berdi.
Qayiq belgilangan joylarga yetib borishi uchun notekis va noqulay yo‘llarda bemalol harakat qila oladigan 4x4 toifadagi “GAZ-66” rusumli avtomobilga o‘rnatilgan. Bu avtomobil qo‘shimcha 1700 litr suv sig‘adigan sisterna, 1 dona motopompa va boshqa zarur bo‘ladigan yong‘in o‘chirish asboblari, jumladan, 5 dona yong‘in o‘chirish xlopushkasi, yong‘in o‘chirish yenglari hamda suv etiklari bilan jihozlangan.
“O‘zbekistondagi jami qamishzorlarning 50 foizi Mo‘ynoq tumanida joylashgan. Qamishzorlarda kelib chiqqan yong‘inlarni bartaraf etishda yong‘in xavfsizligi xizmati xodimlari qiyinchiliklarga duch kelardi. Chunki botqoqlik, qalin qamishzorliklarga kirib borish imkoniyati deyarli yo‘q. Yong‘in o‘chirish transportlarimiz og‘irligi esa 9—11 tonna atrofida. Uni botqoqqa kiritish mumkin emas”, — degan Qoraqalpog‘iston Yong‘in xavfsizligi boshqarmasi boshlig‘i, mayor Azamat Davletov.
“Yong‘in o‘chirish qayig‘i” esa 2 kishidan iborat ekipajga ega. Qayiqda 1 dona motopompa (sekundiga 16 litr suv beradi), yong‘in o‘chirish yenglari (75 millimetrli suruvchi yeng va 51, 66 millimetrli bosim ostida ishlovchi yenglar) va 2 dona suv etiklari mavjud.
Hozirgi kunda qayiq Mo‘ynoq tumani yong‘in xavfsizligi bo‘linmasining jangovar hisobiga topshirilgan.
Izoh (0)