Minskda tashkil etilgan O‘zbekiston—Belarus hududlararo forumida Namangan hamda Vitebsk viloyatlari o‘rtasida savdo-iqtisodiy, ilmiy-texnik hamda madaniy-gumanitar sohalarda hamkorlik kelishuvi imzolandi. Bu haqda “Daryo”ga viloyat hokimligi axborot xizmati ma’lum qildi.
Ikki viloyat o‘rtasida hamkorlik aloqalarining tamali bo‘lgan ushbu kelishuv Namangan viloyati hokimining birinchi o‘rinbosari Ayubxon Kamalov hamda Vitebsk viloyati ijroiya qo‘mitasi raisi o‘rinbosari Boris Yefremov tomonidan imzolandi.
Ushbu kelishuv viloyatlar korxona va tashkilotlari o‘rtasida savdo-iqtisodiy aloqalarni bog‘lashi, bu esa o‘z navbatida boshqa sohalarda hamkorlikni kuchaytirishi qayd etildi. Bu maqsadda o‘zaro mahsulot va xizmatlarni sotib olish bo‘yicha tuzilgan shartnomalarni qo‘llab-quvvatlash, hamkorlikda ikki viloyat ishbilarmonlari ishtirokida turli biznes-seminarlar, ko‘rgazmalar tashkil etishga kelishib olindi.
Forum doirasida Savdo-sanoat palatasi viloyat hududiy boshqarmasi hamda Belarus Savdo-sanoat palatasi Vitebsk bo‘limi o‘rtasida ham hamkorlik shartnomasi imzolandi.
Avvalroq Ayubxon Kamalov boshchiligida SSP Namangan viloyat hududiy boshqarmasi, "Kosonsoy farm" EIZ, "Dori-darmon" AJ, "Namanganvino" AJ, "Sohibqiron" fermer xo‘jaligi vakillaridan iborat viloyat delegatsiyasi Vitebskka safar qilgandi.
Safar davomida ikki viloyat o‘rtasida o‘zaro hamkorlik istiqbollari muhokama qilinib, viloyatlarning investitson hamda eksport salohiyatlari o‘zaro namoyish etilgan. Safar yakunida MDH hududidagi yirik erkin iqtisodiy zonalardan biri bo‘lgan “Vitebsk” EIZ va “Kosonsoy farm” EIZ ma’muriyatlari o‘rtasida hamkorlik qilish bo‘yicha kelishuv imzolangan.
Izoh (0)