Prezident Shavkat Mirziyoyev mutasaddi vazirliklarga energiya resurslari tariflar narxini oshirishdan avval xarajatlarni asoslantirishni vazifa qilib bergan. Bu haqda 1-avgust kuni Moliya vaziri jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Moliya vaziri Jamshid Qo‘chqorovning ma’lum qilishicha, Prezident Shavkat Mirziyoyevga kiritilgan qaror loyihasida aslida energiya resurslari tariflariga juda ham baland narx taklif qilingan. Narx-navoni ishlab chiqishga moliya va energetika vazirligi mas’ul bo‘lgan.“Prezident oldimizga savol qo‘ydilar: ‘Xo‘p, narxni oshirmoqchisizlar ekan, avval ularning (‘O‘ztransgaz’ AJ va ‘O‘zbekenergo’ AJ — tahr.) xarajati asoslanganmi yoki yo‘qmi, ularning ichida zahiralar bormi yoki yo‘qmi? Mana shu ikkita savol bilan bizni qaytardi. Aslida bu narxlar 1-iyulda qabul qilinishi kerak edi. Shuning uchun bu orada “O‘zbekneftgaz” kompaniyasini isloh qilish bo‘yicha Prezidentning qarorlari chiqdi”, — dedi moliya vaziri.
Jamshid Qo‘chqorovning qo‘shimcha qilishicha, bularning hammasi bir-biriga bog‘liq, chambarchas, bir-biriga kirishib ketgan masalalardir.
“Mana shulardan xulosa qilib yana bir bor aytaman, bu obyektiv holat. Xuddi bahordan keyin yoz kelganidek, yozdan keyin kuz kelgandek. Qarorning chiqishi yo menga, yo kimgadir, yo energetika vaziriga bog‘liq emas. Yana bir bor aytaman bozor iqtisodiyoti qurmoqchi bo‘lsak, bozor iqtisodiyotida narxlar erkin bo‘lishi kerak”, — dedi Qo‘chqorov.
Oldinroq, O‘zbekiston moliya vaziri energetika tizimida korrupsiya va ish tizimidagi kamchiliklar energiya resurslari tariflariga qay darajada ta’sir o‘tkazayotgani haqida izoh bergani haqida xabar bergan edik.
Izoh (0)