Минскда ташкил этилган Ўзбекистон—Беларусь ҳудудлараро форумида Наманган ҳамда Витебск вилоятлари ўртасида савдо-иқтисодий, илмий-техник ҳамда маданий-гуманитар соҳаларда ҳамкорлик келишуви имзоланди. Бу ҳақда «Дарё»га вилоят ҳокимлиги ахборот хизмати маълум қилди.
Икки вилоят ўртасида ҳамкорлик алоқаларининг тамали бўлган ушбу келишув Наманган вилояти ҳокимининг биринчи ўринбосари Аюбхон Камалов ҳамда Витебск вилояти ижроия қўмитаси раиси ўринбосари Борис Ефремов томонидан имзоланди.
Ушбу келишув вилоятлар корхона ва ташкилотлари ўртасида савдо-иқтисодий алоқаларни боғлаши, бу эса ўз навбатида бошқа соҳаларда ҳамкорликни кучайтириши қайд этилди. Бу мақсадда ўзаро маҳсулот ва хизматларни сотиб олиш бўйича тузилган шартномаларни қўллаб-қувватлаш, ҳамкорликда икки вилоят ишбилармонлари иштирокида турли бизнес-семинарлар, кўргазмалар ташкил этишга келишиб олинди.
Форум доирасида Савдо-саноат палатаси вилоят ҳудудий бошқармаси ҳамда Беларусь Савдо-саноат палатаси Витебск бўлими ўртасида ҳам ҳамкорлик шартномаси имзоланди.
Аввалроқ Аюбхон Камалов бошчилигида ССП Наманган вилоят ҳудудий бошқармаси, "Косонсой фарм" ЭИЗ, "Дори-дармон" АЖ, "Наманганвино" АЖ, "Соҳибқирон" фермер хўжалиги вакилларидан иборат вилоят делегацияси Витебскка сафар қилганди.
Сафар давомида икки вилоят ўртасида ўзаро ҳамкорлик истиқболлари муҳокама қилиниб, вилоятларнинг инвестицон ҳамда экспорт салоҳиятлари ўзаро намойиш этилган. Сафар якунида МДҲ ҳудудидаги йирик эркин иқтисодий зоналардан бири бўлган «Витебск» ЭИЗ ва «Косонсой фарм» ЭИЗ маъмуриятлари ўртасида ҳамкорлик қилиш бўйича келишув имзоланган.
Изоҳ (0)