Bugun “Obod markaz” loyihasi doirasida Rishton tumanining shohko‘chalari 25 metrga kengaytirilib, 3 tasmali yo‘l tashkil etilmoqda. Yo‘lning ikki chetida zamonaviy infratuzilma yaratilmoqda. Eng muhimi, bu jarayonda ikki yo‘l chetida 400 dan ortiq oilalar uylarini yangidan qurmoqda, deyiladi O‘zbekiston Respublikasi Xalq qabulxonasi xabarida.
Ularga kompensatsiya pulidan tashqari qurilish materiallari yetkazib berilmoqda. Biroq uy degani o‘z-o‘zidan ko‘tarilib qolmaydi. Boz ustiga Rishtonda uy qurayotganlarning aksariyati kulol, ular orasida og‘ir ijtimoiy ahvoldagi oilalar, yakka-yolg‘izlar, nogironligi bor shaxslar ko‘p. Sovuq kunlar yaqinlashmoqda. Ular kuzgacha uyini bitirib olishi kerak. Biroq pul va qurilish materiallari berilgani bilan hammasini aholining gardaniga tashlab qo‘yib bo‘lmaydi.
Shuning uchun bir paytlar Katta Farg‘ona kanalini birga qazib, butun vodiyga obi hayot keltirgan mard-tanti, mehnatkash va olijanob Farg‘ona ahli bir yoqadan bosh chiqarib, Rishton ahliga yordam bermoqda, deyiladi xabarda.
30-iyul kuniga qadar Rishtonda uy qurayotgan oilalarga qariyb 1 million 400 ming dona g‘isht, 441 tonna sement, 161 mashina qum, 585 mashina shag‘al, 600 dona shifer yetkazib berildi. Buning natijasida ayni paytda 152 ta yangi xonadonning poydevori qurildi, 116 ta uyning g‘ishti terilmoqda, 4 ta uyda suvoq, 10 ta xonadonda tom yopish ishlari ketmoqda. Bu jarayonda 151 ta texnika, minglab quruvchilar ishlamoqda, ularga asosan obodonlashtirish, jamoatchilik asosida ish bilan ta’minlangan fuqarolar, tashabbuskor insonlar yordam bermoqda.
Yana bir fakt: birgina Rishton tumanining o‘zida uy-joyini yangilayotgan xonadonlarda yashovchi 535 nafar fuqaro jamoatchilik asosida ish bilan ta’minlangan. Ular o‘z uyida ishlamoqda. Buning uchun davlatdan 600-800 ming so‘m atrofida oylik ham olmoqda.
Qalaynov mahallasida yashovchi 59 yoshli Adhamjon Abdullayev va o‘g‘li Shahzod o‘z uyida ustalarga yordam berib, jamoatchilik asosida ish bilan ta’minlangan. Ular barpo qilayotgan ikki qavatli uyning birinchi qavati do‘kon, ikkinchi qavati esa mehmonxona bo‘ladi.
Tumanning Markaz mahallasida yashaydigan Dildora Tojiboyeva bir o‘g‘li bilan ota-onasining uyida yashaydi. Ularning buzilgan uy-joyi uchun boshqa mahalladan 9 sotix yer, kompensatsiya puli, bundan tashqari yetarlicha sement, qum, g‘isht yetkazib berildi. Ular ayni paytda podvali bilan ikki qavatli uy qurmoqda. Uyning birinchi qavatida ikkita do‘kon bo‘ladi. Shu do‘konlar ortidan ular barqaror ishli-daromadli, yangi uyli bo‘lishadi.
Izoh (0)