O‘zbekistonda 196,7 mln so‘mlik “chiroyli” telefon raqamlari sotildi

Tovar xomashyo birjasida 4-iyundan boshlab ishga tushirilgan chiroyli sonlar kombinatsiyasiga ega uyali telefon raqamlarini sotish bo‘yicha yangi savdo platformasi va mobilraqam.uzex.uz veb saytida boshlang‘ich bahosi 4 000 000 so‘mlik birinchi “chiroyli” mobil  raqami 5 360 000 so‘mga sotildi.

Spot’ning xabar berishicha, yangi platforma ishga tushirilgan paytidan buyon Ucell uyali aloqa operatorining 196,7 million so‘mlik 121 ta mobil raqamlari sotilgan.

Tovar xomashyo birjasining elektron savdolarida respublikaning barcha hududlaridan xaridorlar ishtirok etgan. O‘tgan savdo natijalariga ko‘ra sotib olingan raqamlarning tarkibiy tuzilmasida poytaxt hududining xaridorlari yetakchilik qilib, ularning umumiy sotuvlardagi ulushi 42 foizni tashkil etgan.

Jizzax viloyati xaridorlarining ulushi 15 foiz, Samarqand va Qashqadaryo viloyatlarining har birini hissasi 7 foizni tashkil etdi.