Xalqaro olimpiada g‘olibining o‘qituvchisiga eng kam oylik ish haqining 450 baravari miqdorida bir martalik pul mukofoti beriladi. Bu haqda 30-iyul kuni Xalq ta’limi vazirligi vakillari jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Anjumanda Xalq ta’limi vazirining birinchi o‘rinbosari Alisher Umarov Prezident Shavkat Mirziyoyevning “Iqtidorli yoshlarni aniqlash va yuqori malakali kadrlar tayyorlashning uzluksiz tizimini tashkil etish chora-tadbirlari to‘g‘risida”gi qarorida olimpiada g‘olibi o‘qituvchisiga avtomobil sotib olishga yetarli mablag‘ berilishi haqida ma’lumot berdi.
“Mendan bir o‘qituvchi: ‘Agar o‘quvchim xalqaro olimpiadada birinchi o‘rinni olsa, mashina sotib ololamanmi?’, deb so‘radi. Shunda, marhamat, o‘zingiz qarang, qarorda yozib qo‘yibdi: o‘quvchingiz xalqaro olimpiadada birinchi o‘rinni oladigan bo‘lsa, 91 million so‘m beriladi. Bu Cobalt narxi emasmi? Bemalol olsa bo‘ladimi? Bo‘ladi. Bundan tashqari, bu o‘qituvchi har oyda ustama ham oladi. Ustama bilan qo‘shib hisoblaganda oyligi 40 million so‘mgacha yetishi mumkin. Biz o‘tgan matbuot anjumanlarida qachon o‘qituvchilarning oyligi 1000 dollar bo‘lishi haqida gaplashgan edik. O‘qituvchi olgan oylik 40 million so‘m bo‘lsa, bu summa taxminan 5 ming dollarga yaqin bo‘ladi. O‘quvchisi xalqaro olimpiada g‘olibi bo‘lgan o‘qituvchi 5 ming dollar oylik oladi”, — dedi vazir o‘rinbosari.
Ma’lumot uchun, qarorda xalqaro olimpiada g‘oliblari va ularning o‘qituvchilari eng kam oylik ish haqining quyidagi miqdorida bir martalik pul mukofotlari bilan taqdirlanishi belgilangan:
1-o‘rin (oltin medal) uchun — 500 (101 million so‘m), o‘qituvchisiga — 450 baravari (91 million so‘m);2-o‘rin (kumush medal) uchun — 300 (60 million so‘m), o‘qituvchisiga — 250 baravari (50 million so‘m);3-o‘rin (bronza medal) uchun — 200 (40 million so‘m), o‘qituvchisiga — 150 baravari (30 million so‘m).
Asosiy olimpiadaning respublika bosqichi g‘oliblari o‘qituvchilari eng kam oylik ish haqining quyidagi miqdorida bir martalik pul mukofotlari bilan taqdirlanishi ko‘rsatilgan:
1-o‘rin uchun — 50 baravari (10 million so‘m);2-o‘rin uchun — 35 baravari (7 million so‘m);3-o‘rin uchun — 30 baravari (6 million so‘m).
Izoh (0)