Hindiston politsiyasi soxta elchixona yuritishda ayblanayotgan erkakni hibsga oldi. Bu haqda The Guardian xabar berdi.
Ta’kidlanishicha, ayblanuvchi Dehli yaqinidagi ijaraga olingan turar joy binosidan elchixona sifatida foydalangan. Gumonlanuvchi o‘zini elchi sifatida tanishtirgan va odamlarga xorijda ish topib berishni va’da qilib, ulardan pul undirgan. Politsiya ma’lumotlariga ko‘ra, ayblanuvchi — 47 yoshli Harshvardxan Jain — Seborga va Westarctica kabi tuzilmalarda maslahatchi yoki elchi sifatida ishlaganini da’vo qilgan.
Politsiya soxta elchixona binosida Jainning jahon yetakchilari bilan birga tushgan ko‘plab fotosuratlari, Hindiston tashqi ishlar vazirligi va 30 ga yaqin davlatning soxta muhrlarini topgan. Ayblanuvchiga tegishli bo‘lgan soxta diplomatik raqamli mashinalar va boshqa topilgan ashyolar musodara qilingan. Ular orasida naqd 4,5 million rupiya, 4 ta mashina hamda boshqa mamlakatlar pul birliklari mavjud.
Jain, shuningdek, chet elda soxta kompaniyalar yuritishda gumon qilinmoqda. Xususan, u qalbakilashtirish, o‘zini boshqa shaxs qilib ko‘rsatish va soxta hujjatlarga egalik qilishda aybdor deb topildi.
Izoh (0)