Xalqaro sotsiologlar guruhi tomonidan o‘tkazilgan keng qamrovli tadqiqot xulosasiga ko‘ra, to‘rt kunlik ish haftasiga o‘tgan kompaniyalarda ish unumdorligi oshadi, xodimlar salomatligi yaxshilanadi va daromad hajmi ham oshadi, deb yozadi “Pravila jizni”. Tadqiqot natijalari Nature Human Behavior jurnalida chop etilgan.
Tajriba 4 Day Week Global notijorat tashkiloti tomonidan o‘tkazilgan bo‘lib, unda AQSH, Buyuk Britaniya, Kanada, Avstraliya va Irlandiyadan jami 140 dan ortiq kompaniya ishtirok etgan. Ular olti oy davomida xodimlarini haftasiga 40 emas, 32 soat ishlashga o‘tkazgan, ularning ish haqi esa o‘zgartirilmay qoldirilgan.
Dastlabki ikki bosqichda 33 ga yaqin kompaniya ishtirok etdi. Tadqiqot tugagach, kompaniyalarning birorta xodimi to‘rt kunlik ish haftasidan voz kechishni istamadi. Korxonalar faoliyatida esa ish unumdorligi oshgani va daromad miqdori ko‘paygani qayd etildi. Bu orada xodimlar stress, charchoq holatlarining kamayganini va sog‘lig‘i yaxshilanganini aytdi.
Dastlab to‘rt kunlik ish haftasiga o‘tishning ilk kunlarida xodimlar vazifalari biroz ko‘paydi, ammo bunga javoban ko‘plab kompaniyalar ortiqcha yig‘ilishlardan voz kechib, o‘rniga telefon qo‘ng‘iroqlari va messenjerlar yozishmalari orqali ko‘plab masalalarni hal qila oldi.
Qo‘shimcha dam olish kunlarini esa xodimlar oila, shaxsiy yumushlar, tibbiy ko‘riklar, uy ishlari yoki sevimli mashg‘ulotlariga bag‘ishladi. Bunday tartib ish va hayot muvozanatini yaxshilashga, stress va charchoqni kamaytirishga turtki bo‘lgan.
Mazkur tadqiqot mehnat bozorida barqaror va samarali ish tizimini yo‘lga qo‘yishda muhim omil sifatida baholanmoqda.
Izoh (0)