Bortida 43 kishi bilan parvoz qilayotgan An-24 samolyoti Amur viloyatida radarlardan g‘oyib bo‘lgach, uni qidirish uchun M-8 vertolyoti yuborildi. Oradan ko‘p o‘tmay havo kemasi Amur viloyatining Tinda shahridan 15 km uzoqlikdagi tog‘ yonbag‘ridan topilgan. Rossiya nashrlarining favqulodda xizmatlarga tayanib xabar berishicha, fojiadan omon qolganlar yo‘q.
Dastlabki ma’lumotlarga ko‘ra, “Angara” aviakompaniyasiga tegishli An-24 samolyoti Xabarovsk—Blagoveshchensk—Tinda yo‘nalishida parvoz qilayotib, Tinda aeroportiga qo‘nish uchun ikkinchi aylanaga kirish chog‘ida radarlardan yo‘qolgan. Uning bortida 43 kishi, jumladan besh nafar bola va ekipajning olti a’zosi bo‘lgan. Keyinroq buni Amur viloyati gubernatori Vasiliy Orlov ham tasdiqladi.
Samolyot bundan qariyb yarim asr avval ishlab chiqarilgan bo‘lsa-da, uning parvozga yaroqlilik sertifikati 2036-yilgacha uzaytirilgani ma’lum bo‘ldi.
RF Tergov qo‘mitasining Sharqiy boshqarmasi Rossiya JKning 263-moddasi 3-qismi (havo transporti harakati va ekspluatatsiyasi xavfsizligi qoidalarini buzish oqibatida uch va undan ortiq odamning o‘limiga sabab bo‘lish) bo‘yicha jinoyat ishi qo‘zg‘atgan.
Izoh (0)