Ko‘plab rejissyorlar filmda qandaydir sir yoki yashirin ma’no qoldirishni yaxshi ko‘radi. Ba’zi kinoshinavandalar buni darhol payqashadi, ba’zi tafsilotlarga esa yillar davomida e’tibor berishmaydi.
“Garri Potter”
Umuman olganda, Xogvarts dunyosi keyingi voqealar rivojini tushunishga yordam beradigan turli-tuman detallarga boy.
Filmlardagi ko‘p narsalar yetti raqami bilan bog‘liq. Masalan, dastlabki ikki filmda kvidish kiyimlarida raqamlar yo‘q edi, “Azkaban mahbusi”dan boshlab esa Garrining libosida yetti raqami paydo bo‘ladi. Esingizda bo‘lsa, Garri rejalashtirilmagan yettinchi tilsim bo‘lib chiqadi.
“Kalmar o‘yini”
Birinchi mavsumda xona devorlarida o‘yinlarga ishoralar borligini ko‘pchilik payqamagandi. Ikkinchi mavsumda esa devorlarning dizayni biroz o‘zgarib, osilib turgan odamchalar tasvirlangandi. Faqatgina uchinchi mavsum bu jumboqning yechimini ochdi: bo‘m-bo‘sh zalning devorlarida HODIE MIHI CRAS TIBI degan yozuv bor edi. Lotinchadan tarjimasi “Bugun — men, ertaga — sen” degan ma’noni anglatib, o‘yinda ishtirok etishning xavfli va o‘limga olib kelishi mumkinligiga ishora qilardi.
“Truman shousi”
“Truman shousi” filmida realiti-shou ijodkorlari doimo turli mahsulotlarni reklama qiladi. Misol uchun, Trumanning ekrandagi xotini naqshli oq ipak xalatda paydo bo‘ladi va keyinroq xuddi shu xalat filmda teleko‘rsatuv tomoshabinlaridan birida ko‘rsatiladi. Bu Trumanning soxta voqeligi qanchalik tijoratga aylantirilganini yana bir bor ta’kidlaydi.
“Prestij”
Kristofer Nolanning filmlari doimo sir-sinoatlar va ma’noli ishoralarga to‘la. Jumladan, “Prestij” trillerida ham yechimni oldindan ilg‘ab olish mumkin. Tajribalardan holdan toygan Robert Enjer raqibi Alfred Bordendan g‘oyib bo‘lish sirini so‘raydi: ular egizak aka-ukaligi ma’lum bo‘ladi. Hammasi shunchalik oddiyki, buni oldindan payqasa bo‘lardi. Shunchaki qushchaning g‘oyib bo‘lish fokusini kuzatayotgan va keyinchalik Alfreddan “Uning akasi qayerda?” deb so‘ragan kichkina bolani eslang.
“Titanik”
Film boshida Rouzning soch turmagi va kiyimlari ancha rasmiy va qat’iy ko‘rinishga ega. Qahramon birinchi marta ko‘ringan libosi esa oq-qora yo‘l-yo‘l bo‘lgani tufayli mahbuslar kiyimini eslatadi. Keyinchalik u Jekni sevib qolganda, sochlari va ko‘ylaklari erkin ko‘rinish ola boshlaydi.
Rouzning film boshida asosiy zinapoyada soat oldida Jek bilan uchrashish uchun kiygan ko‘ylagi yakuniy sahnada yana paydo bo‘ladi. Ko‘ylak aynan o‘sha-o‘sha, faqat rangi oq. Shundan taxmin qilish mumkinki, vafotidan so‘ng Rouz jannatga tushib, u yerda sevgilisi bilan qayta uchrashadi va shu bilan soat oldida uchrashish va’dasini bajaradi.
“Dedpul va Rosomaxa”
“Dedpul va Rosomaxa” blokbasterida Jon Xyuzning mashhur “Samolyot, poyezd, mashina” komediyasidagi yonib ketgan avtomobil kadrda paydo bo‘ladi. Bu bejiz emas: Dedpul rolini ijro etgan aktyor Rayan Reynolds bu filmning, ayniqsa Jon Kendi personajining ashaddiy muxlisi. Shu sababli Dedpul va Rosomaxaning do‘stligi Jon Kendi va Stiv Martin qahramonlari o‘rtasidagi munosabatga o‘xshab rivojlanadi: jiddiy va jahldor Rosomaxa ezma Dedpulni zo‘rg‘a qabul qiladi.
Rayan Reynolds asli kanadalik ekanini hisobga olsak, uning hazil-mutoyiba uslubi yana bir kanadalik aktyor Jon Kendi ta’sirida shakllanganiga ajablanmasa ham bo‘ladi. Jon Kendiga hurmat bajo keltirish maqsadida Rayan Reynolds hatto u haqida hujjatli film suratga olishni rejalashtirmoqda.
“To‘lin oy qirolligi”
Ues Anderson filmlaridagi har bir mayda-chuyda tafsilotni nazorat qilishi va eng sinchkov muxlislari uchun yashirin ma’nolarni qoldirishni yoqtirishi bilan tanilgan. “To‘lin oy saltanati” filmida bosh qahramonni tez-tez ilmiy-fantastik romanlarni o‘qiyotganini ko‘rish mumkin. Bu kitoblarning birortasi ham haqiqiy emas, biroq ulardan birining orqa muqovasida Frenk Gerbertning “Dyuna” asaridagi xarita tasvirlangan.
Izoh (0)