AQShda 2001-yilning 11-sentabridagi terror tashkilotchilaridan biri Xolid Shayx Muhammad ushbu teraktga aloqadorlikda Saudiya Arabistonini ayblayotganlar tomoniga o‘tishga tayyorligini bildirdi. The Wall Street Journal gazetasining yozishicha, buning evaziga Amerika hukumatidan unga o‘lim jazosini qo‘llamaslikni talab qilgan.
“TASS”ning yozishicha, ayblanuvchi o‘z advokati tomonidan 26-iyulda Manxetten okrugidagi federal sudga yuborgan xatida shunday taklif bilan chiqqan. Aynan shu yerda Ar-Riyodga qarshi 800 kishi tomonidan berilgan da’vo arizasi ko‘rib chiqilmoqda. Ular orasida 11-sentabrdagi teraktda qurbon bo‘lganlarning qarindoshlari va jabrlanganlar ham bor.
Ular 2017-yilda Saudiya Arabistonini sudga berib, qirollik hukumatini qariyb 3000 kishining umriga zomin bo‘lgan “Al-Qoida” terrorchilik tizimini qo‘llab-quvvatlaganlikda ayblagan.
AQShda qirollik rasmiylari “Al-Qoida” faoliyatiga beparvolik bilan qaragani va hatto ular bilan aloqada bo‘lgani haqidagi taxminlar bir necha bor aytilgan va shu sababli terakt uchun javobgarlikning bir qismini bo‘yniga olishi kerakligi ta’kidlangan. Ar-Riyod esa o‘zining bunga aloqadorligini rad etgan.
Eslatib o‘tamiz, 2001-yilning 11-sentabrida “Al-Qoida” terrorchilik guruhining 19 nafar a’zosi AQShning 4 ta yo‘lovchi samolyotini qo‘lga olgan. Terrorchilar ularning 2 tasini o‘sha paytda AQShda eng baland bo‘lgan Jahon savdo markazining 110 qavatli egizak binolariga, uchinchi samolyotni Vashington tashqarisidagi AQSh mudofaa vazirligi binosiga, to‘rtinchisi ham Amerika poytaxtiga yo‘naltirilgan, ammo u Pensilvaniya shtatidagi Shanksvill shahrida halokatga uchragan. Terakt oqibatida 2 977 kishi halok bo‘lgan.
Izoh (0)