АҚШда 2001 йилнинг 11 сентябридаги террор ташкилотчиларидан бири Холид Шайх Муҳаммад ушбу терактга алоқадорликда Саудия Арабистонини айблаётганлар томонига ўтишга тайёрлигини билдирди. The Wall Street Journal газетасининг ёзишича, бунинг эвазига Америка ҳукуматидан унга ўлим жазосини қўлламасликни талаб қилган.
«ТАСС»нинг ёзишича, айбланувчи ўз адвокати томонидан 26 июлда Манхэттен округидаги федерал судга юборган хатида шундай таклиф билан чиққан. Айнан шу ерда Ар-Риёдга қарши 800 киши томонидан берилган даъво аризаси кўриб чиқилмоқда. Улар орасида 11 сентябрдаги терактда қурбон бўлганларнинг қариндошлари ва жабрланганлар ҳам бор.
Улар 2017 йилда Саудия Арабистонини судга бериб, қироллик ҳукуматини қарийб 3000 кишининг умрига зомин бўлган «Ал-Қоида» террорчилик тизимини қўллаб-қувватлаганликда айблаган.
АҚШда қироллик расмийлари «Ал-Қоида» фаолиятига бепарволик билан қарагани ва ҳатто улар билан алоқада бўлгани ҳақидаги тахминлар бир неча бор айтилган ва шу сабабли теракт учун жавобгарликнинг бир қисмини бўйнига олиши кераклиги таъкидланган. Ар-Риёд эса ўзининг бунга алоқадорлигини рад этган.
Эслатиб ўтамиз, 2001 йилнинг 11 сентябрида «Ал-Қоида» террорчилик гуруҳининг 19 нафар аъзоси АҚШнинг 4 та йўловчи самолётини қўлга олган. Террорчилар уларнинг 2 тасини ўша пайтда АҚШда энг баланд бўлган Жаҳон савдо марказининг 110 қаватли эгизак биноларига, учинчи самолётни Вашингтон ташқарисидаги АҚШ мудофаа вазирлиги биносига, тўртинчиси ҳам Америка пойтахтига йўналтирилган, аммо у Пенсильвания штатидаги Шанксвилл шаҳрида ҳалокатга учраган. Теракт оқибатида 2 977 киши ҳалок бўлган.
Изоҳ (0)