Braziliya terma jamoasi va “Gremio” hujumchisi Everton Londonning “Arsenal” klubiga o‘tishga yaqin, deya xabar beradi Sky Deutschland.
Manbaga ko‘ra, futbolchining transfer narxi 40 million yevroga baholanmoqda.
Ma’lumot uchun, Everton “Fortaleza” tarbiyalanuvchisi hisoblanadi. U 2013-yilning yanvar oyida 16 yoshida “Gremio” akademiyasiga kelgandi. Oradan bir yil o‘tib hujumchi Portu-Alegri klubining asosiy tarkibida maydonga tushgandi.
Qayd etish lozim, Everton joriy mavsum klub safida 13 ta uchrashuvda maydonga tushib, 6 ta gol urdi va 1 ta golli uzatma berdi. Uning “Gremio” bilan amaldagi shartnomasi 2022-yilning oxirigacha amal qiladi.
Shuningdek, Everton Brazliya terma jamoasi tarkibida 12 ta o‘yinda 3 ta gol urishga erishdi. U terma jamoadagi barcha gollarini Kopa Amerika musobaqasida urdi.
Eslatib o‘tamiz, Braziliya mazkur musobaqada g‘olib bo‘ldi va Everton perulik Xose Paolo Gerrero bilan birga musobaqaning eng yaxshi to‘purariga aylandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)