“Uzagrostar xolding” kompaniyasi faoliyat boshladi

Davlatimiz rahbarining joriy yil 14-fevraldagi “Tomorqa yer egalari va dehqon xo‘jaliklari faoliyatida zamonaviy tashkiliy tizimni joriy qilish va moliyaviy qo‘llab-quvvatlashning qo‘shimcha chora-tadbirlari to‘g‘risida”gi Farmoni hamda “Uzagrostar xolding” kompaniyasi faoliyatini tashkil etish to‘g‘risida»gi qarori bilan yangicha tizimga asos solindi. Mazkur muhim hujjatlarning ijrosi yuzasidan tizimli ishlar olib borilmoqda.

Xususan, “Uzagrostar xolding” kompaniyasi ustavi, tashkiliy tuzilmasi va rahbariyati tasdiqlanib, jamiyat davlat ro‘yxatidan o‘tkazildi. Xududlarda kompaniyaning 10 ta Loyiha ofislari tashkil qilindi.

Shuningdek, 6 ta ixtisoslashgan kompaniyalarning ustavi, tashkiliy tuzilmasi va rahbarlari tasdiqlanib, davlat ro‘yxatidan o‘tkazildi.

Hozirda ixtisoslashgan kompaniyalarni tijorat banklariga ishonchli boshqaruvga berish bo‘yicha hujjat loyihalari ishlab chiqilgan.

“Biznesni rivojlantirish banki” ATB Boshqaruvi raisi yangi tuzilgan Tomorqa yer egalari va dehqon xo‘jaliklari faoliyatini rivojlantirish va qishloq xo‘jaligi mahsulotlari ishlab chiqarishni kengaytirish bo‘yicha Kengashning ham raisi etib tasdiqlandi. Shundan kelib chiqib bankning markaziy idorasida Tomorqa biznesini rivojlantirish departamenti va hududlarda tegishli bo‘lim va sho‘balar tashkil etilib, malakali xodimlar bilan butlandi.

Kuni kecha “Yangiyo‘l Agro star” MCHJga qamrab olinadigan tuman sifatida biriktirilgan Asaka tumanida Iqtisodiyot va moliya vazirligi, Kengash va “Uzagrostar xolding” kompaniyasi rahbariyati ishtirokida amaliy muloqotlar o‘tkazildi.

Xususan, Osiyo taraqqiyot bankining O‘zbekistondagi vakolatxonasi qishloq xo‘jaligi va tabiat resurslari masalalari bo‘yicha katta iqtisodchisi Leonard Leung, xalqaro ekspert-agronomlar — Marina Stankovich (Serbiya), Chingiz Yalchin (Turkiya) bilan uchrashuv bo‘lib o‘tdi. Muloqot yakunida hududlarda mazkur xalqaro ekspertlar bilan hamkorlikda ishlash bo‘yicha kelishuvga erishildi.

Joriy yil 24-fevral kuni Kengash aʼzolari hamda Qishloq xo‘jaligi vazirligi hamkorligida “Qishloq xo‘jaligidagi bilim va innovatsiyalar markazi”da qishloq xo‘jaligi vazirligi tizimidagi ilmiy-tadqiqot institutlari olimlari tomonidan aholi tomorqalari va ijara yer maydonlarida “Xonadonbay” usulida amalga oshirilayotgan loyihalar yuzasidan taqdimot o‘tkazildi. Tadbir davomida respublikadagi yetakchi olim va agronomlarni tanlab olingan yo‘nalishlarga biriktirishga kelishib olindi.

Joylarda belgilangan vazifalar bo‘yicha olib borilayotgan ishlarni tizimli tashkil etish maqsadida “Uzagrostar xolding” kompaniyasida ixtisoslashuvdan kelib chiqqan holda tegishli tijorat banklari mutaxassislaridan iborat doimiy ishlovchi Guruh faoliyati yo‘lga qo‘yildi.

Reklama huquqi asosida.