“Barselona” tarixidagi eng qimmat 5 transfer haqida

Antuan Grizmanni 120 million yevroga sotib olgan “Barselona” so‘nggi 10 yil ichida futbolchilar transferi uchun 1 milliard yevrodan ortiq mablag‘ sarflagan ilk klubga aylandi.

La Masiya deb nomlanadigan dunyoga mashhur akademiyasidan Messi, Xavi, Valdes, Puyol, Inyesta va Pike kabi futbolchilarni yetishtirib chiqargan “Barselona”ning transferlar uchun kosmik pullarni sarflashi kishini hayratga solishi tabiiy, albatta.

Ammo ko‘p narsa o‘zgarmoqda. Kataloniyaliklar “Manchester Siti”, “Real” va PSJ kabi klublardan ortda qolmaslik uchun ham ko‘proq mablag‘ sarflashga majbur bo‘lmoqda. Shuning uchun bo‘lsa kerak, ayni damda futbol klublari tomonidan amalga oshirilgan eng qimmat 10 ta transferning uchtasi “Barselona”ga tegishli.

Quyidagi “ko‘k-anorranglilar” tarixidagi eng qimmat 5 transferni ko‘rib chiqamiz:

5. Frenki de Yong: “Ayaks” — “Barselona”, 67 million funt (2019)

2018/19-yilgi mavsumdagi harakatlari sabab Frenki darhol kimsan “Barselona”dan taklif oldi va unga “labbay” deb javob berdi. Kataloniyaliklar 22 yoshli iqtidor uchun 67 million funtning bahridan o‘tdi.

Niderlandiyalik futbolchi qoyilmaqom iqtidorga ega. “Barselona” rahbariyatini de Yongning hammasidan ham o‘yinni o‘qiy olishi va boshqara olish qobilyati o‘ziga qaratgani bejiz emas. Agar u yangi jamoasida ham o‘sishdan to‘xtamasa, albatta, “Kamp Nou”dagilarning yoqimtoyiga aylanadi.

4. Luis Suares: “Liverpul” — “Barselona”, 67 million funt (2014)

Dunyoning eng kuchli hujumchilaridan biri Luis Suares 2014-yil 67 million funt evaziga “Liverpul”ni tark etib, “Barselona”ga o‘tgandi. U klubga kelgandan so‘ng ham faqat yuqori darajaga chiqishda davom etdi. Klubga kelishdan avval 4 oylik diskvalikatsiya uchraganiga qaramay, Suares juda tez moslashib ketishga erishdi. Bunga isbot sifatida uning Kataloniyadaigi ilk mavsumida 25 ta gol ura olganini ko‘rsatish mumkin.

Hozirda 32 yoshni qoralab qo‘ygan Luis “Barselona”dagi ikkinchi mavsumida 40 ta gol urdi va Ispaniya “Oltin butsa”si egasiga aylandi. Qayd etish joiz, 2009-yildan beri La Liga “Oltin butsa” faqat Leo Messi va Krishtianu Ronalduga nasib qilayotgan edi.

Luis hozirga qadar “Barselona” uchun 247 ta o‘yin o‘tkazib, 177 ta gol urdi  va klub tarixidagi eng yaxshi to‘purarlarning kuchli beshligiga kirdi.

3. Usmon Dembele: “Borussiya D” — “Barsleona”, 97 million funt (2017)

222 million yevro evaziga Neymarni PSJga sotgan “Barselona” darhol braziliyalik futbolchiga o‘rinbosar topish kerak edi. Messi va Suaresga yangi partnyor sifatida esa “Borussiya Dortmund” a’zosi Usmon Dembele tanlandi. Kataloniyalik yosh fransuz uchun 97 million funtdan voz kechishiga to‘g‘ri keldi. Transfer haqiqatan ham katta tavakkalga asoslangan edi. Ammo klub rahbariyati Dembelega ishondi va hamon ishonishda davom etmoqda. Usmonning klubdagi sayohatlari esa jarohat va ichki qoidalarning buzilishi bilan boshlandi. Futbolchi bir necha marta mashg‘ulotlarga kechikib keldi. Shunday muammolarga qaramay hech kim Dembelening katta iqtidorga ega ekanligini inkor qila olmaydi. Ammo uning “Barselona”dagi kelajagi hamon so‘roq ostida. Boisi u hali klubda asosiy o‘yinchiga aylanishi ham boshqa klubga o‘tib ketishi ham mumkin.

2. Antuan Grizmann: “Atletiko M” — “Barselona”, 108 million funt (2019)

Deyarli ikki yil davom etgan “transfer seriali” baxtli yakun topdi. Antuan Grizmann Madrid klubini tark etib, “Barselona”ga o‘tdi. Kataloniya klubi JCh—2018 chempioni uchun “Atletiko M”ga 108 million funt to‘ladi. Dembeledan farqli o‘laroq Grizmanning ayni damdagi holatini ijobiy baholash mumkin. Sababi, Antuan 5 yil davomida “Atletiko Madrid” safida barqaror o‘yin namoyish etdi. U madridliklar bilan Yevropa Ligasi, UEFA Superkubogi kabi sovrinlarni qo‘lga kiritdi. Bundan tashqari 2 marta “Oltin to‘p”ga nomzod sifatida ko‘rsatildi. Ammo hamma ham uning “Kamp Nou”ga o‘tganidan mamnun emas. Negaki, Grizmann 2018-yil yozida “Barselona”ga o‘tishdan bosh tortib, ko‘plab muxlislarning g‘azabiga uchragandi. Endi esa uning klubga moslashib olishi uchun ma’lum vaqt talab etiladi.

1. Filippe Koutinyo: “Liverpul” — “Barselona”, 156 million funt (2018)

“Barselona” tarixidagi eng qimmat transfer 2018-yil amalga oshirilgan. Kataloniyaliklar Koutinyo uchun “Liverpul”ga 156 million funt to‘lagani aytiladi. Filippe bu orqali dunyo futboli tarixidagi eng qimmat uchinchi futbolchiga aylangan.

Braziliyalik futbolchining transfer seriali ham uzoq davom etgan. Filippeni Kataloniyada Andres Inyestaning o‘rinbosari sifatida kutishayotgandi, axir. Va oxir-oqibat Koutinyo “Barselona”ga keldi. Ammo futbolchi uchun 2018/19-yilgi mavsum haqiqatda og‘ir va murakkab o‘tdi. U jamoa uchun 45 ta o‘yin o‘tkazib, 5 ta gol urdi, xolos. Muxlislar va klubdagilar ham undan bundan natijani kutishmgani rost. Uning klubga kelganiga 18 oydan oshdi va ko‘pchilik Filippening Kataloniyada uzoq qolib ketmasligiga ishonmoqda.