28 июль куни Ахборот ва оммавий коммуникациялар агентлигида Давлат тест маркази директори Мажид Каримов ва марказ масъуллари иштирокида матбуот анжумани ташкил этилди. Бу ҳақда «Дарё» мухбири Мадина Нурман хабар бермоқда.
Олий таълим муассасалари бакалавриатига қабул тест синовлари ҳақидаги сўнгги маълумотлар ҳақида гапирар экан, ДТМ раҳбари шу кунга қадар рўйхатдан ўтган абитуриентлар сони 1 066 925 бўлса (979436 нафари тест синовида иштирок этади), улардан 57 минг нафари кириш имтиҳонлари учун рухсатнома олмаганини қайд этди.
Мажид Каримов, Давлат тест маркази директори:
—Айни пайтда уларнинг алоқа учун қолдирган рақамларига СМС-хабарномалар юбориб, рухсатномалар олишларини таъминлаш ҳаракатлари давом этмоқда. Мабодо абитуриент тест кунигача ҳам рухсатномасини олмаса, синовлар ўтказиладиган биноларда ҳам таълим муассасалари қабул комиссиялари томонидан гуруҳлар тузилиб, рухсатнома берилиши ташкил этилади.
— Агар абитуриент маълум бир узрли сабабларга кўра, масалан, транспорт ёки соғлиги юзасидан муаммо туфайли тест кунида имтиҳонга кеч қолса, уни синовлар ўтадиган бошқа кунга кўчириш масаласини давлат комиссиясига таклиф қилиб киритганмиз. Ижро этувчи бўлганимиз сабабли сўнгги қарор уларда қолади. Агар улар тавсия берса, абитуриентни ўтказишимиз мумкин.
— Абитуриентларнинг рўйхатдан ўтиши, аммо маълумотлари оператор ёки ташкилотчилар томонидан базага киритилмай қолиниши муаммоси ҳам бор. Абитуриент олий таълим муассасаси ёки давлат хизматлари марказига келганида рўйхатдан ўтган, аммо қайдномадаги маълумотлари базада оператор хатоси туфайли тўлдирилмаган. Кейинги абитуриент келганида ундан олдинги исм-фамилияга иккинчи абитуриент маълумотлари киритилиши оқибатида чалкашлик содир этилган. Ҳозир ана шу хатолик туфайли 200 нафар абитуриент масаласида давлат комиссиясига мурожаат қилинган. Якуний хулосани комиссия берганидан сўнг улар ҳам тестга қўйилишини таъминлашга ҳаракат қиламиз.
Изоҳ (0)