Bugun, 27-iyul kuni O‘zbekiston Qurolli Kuchlari akademiyasida harbiy xavfsizlik va davlat mudofaasi fakulteti tinglovchilari hamda malaka oshirish fakultetining akademik kurslarini tamomlagan ofitserlarning tantanali bitiruv marosimi bo‘lib o‘tdi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Unda O‘zbekiston Prezidenti huzuridagi xavfsizlik kengashi kotibi Viktor Mahmudov, mudofaa vaziri general-mayor Bahodir Qurbanov, Toshkent shahar Mirzo Ulug‘bek tumani hokimi Shavkatbek Ergashev, davlat va jaomat tashkilotlari vakillari, harbiy xizmatchilar, bitiruvchilarning ota-onalari, oila a’zolari ishtirok etdi.
Bitiruvchi ofitserlarga diplom, ko‘krak nishonlari hamda sertifikatlar topshirildi. Marosimda so‘zga chiqqanlar mazkur ta’lim muassasasining qo‘shinlarimiz uchun yuqori bo‘g‘in qo‘mondonlik ofitserlarini tayyorlash, mudofaa qurilishi sohasida hamda ilmiy tadqiqotlar va ishlanmalarni amalga oshirishdagi g‘oyat muhim o‘rin egallab kelayotganini e’tirof etdilar.
Eng yangi usul va texnologiyalar joriy etilgan, o‘quv auditoriyalari zamonaviy trenajyorlar, o‘quv va laboratoriya asbob-uskunalari hamda kompyuter texnikasi bilan jihozlangan sharoitda, shuningdek, bugungi shiddatli zamon harbiy harakatlari xususiyatlarini, harbiy san’at rivoji tendensiyalarini o‘zida aks ettirgan dala-o‘quv mashqlarida ta’lim olgan ofitserlar Qurolli Kuchlar mudofaa qudrati hamda jangovar shayligini yanada oshirish uchun munosib hissa qo‘shishlariga katta ishonch bildirildi.
Tantanali marosim samimiy tilaklardan keyin Qurolli Kuchlar Markaziy ashula va raqs ansamblining konsert dasturi bilan yakunlandi.
Izoh (0)