Бугун, 27 июль куни Ўзбекистон Қуролли Кучлари академиясида ҳарбий хавфсизлик ва давлат мудофааси факултети тингловчилари ҳамда малака ошириш факултетининг академик курсларини тамомлаган офицерларнинг тантанали битирув маросими бўлиб ўтди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.
Унда Ўзбекистон Президенти ҳузуридаги хавфсизлик кенгаши котиби Виктор Маҳмудов, мудофаа вазири генерал майор Баҳодир Қурбанов, Тошкент шаҳар Мирзо Улуғбек тумани ҳокими Шавкатбек Эргашев, давлат ва жаомат ташкилотлари вакиллари, ҳарбий хизматчилар, битирувчиларнинг ота-оналари, оила аъзолари иштирок этди.
Битирувчи офицерларга диплом, кўкрак нишонлари ҳамда сертификатлар топширилди. Маросимда сўзга чиққанлар мазкур таълим муассасасининг қўшинларимиз учун юқори бўғин қўмондонлик офицерларини тайёрлаш, мудофаа қурилиши соҳасида ҳамда илмий тадқиқотлар ва ишланмаларни амалга оширишдаги ғоят муҳим ўрин эгаллаб келаётганини эътироф этдилар.
Энг янги усул ва технологиялар жорий этилган, ўқув аудиториялари замонавий тренажёрлар, ўқув ва лаборатория асбоб-ускуналари ҳамда компьютер техникаси билан жиҳозланган шароитда, шунингдек, бугунги шиддатли замон ҳарбий ҳаракатлари хусусиятларини, ҳарбий санъат ривожи тенденсияларини ўзида акс эттирган дала-ўқув машқларида таълим олган офицерлар Қуролли Кучлар мудофаа қудрати ҳамда жанговар шайлигини янада ошириш учун муносиб ҳисса қўшишларига катта ишонч билдирилди.
Тантанали маросим самимий тилаклардан кейин Қуролли Кучлар Марказий ашула ва рақс ансамблининг концерт дастури билан якунланди.
Изоҳ (0)