O‘zbekiston Adliya vazirligida 27-iyul kuni navbatdagi kengaytirilgan hay’at majlisi bo‘lib o‘tdi. Vazirlikning Jamoatchilik bilan aloqalar bo‘limidan xabar berishlaricha, majlisda adliya vaziri Ruslanbek Davletov bugungi kunning eng dolzarb masalalaridan bo‘lgan joylarda uy-joylar buzilishlariga e’tiborni qaratdi. Bu masalani har bir adliya organi xodimi alohida ustuvor vazifa sifatida o‘ziga belgilab olishi zarurligi ta’kidlandi.
Adliya vazirining so‘zlariga ko‘ra, adliya tizimi bu muammoning ko‘lami bugungi kundagidek bo‘lishidan uch oy oldin o‘z tahlillarini va choralarini boshlagan edi. Xususan, 2019-yilning may—iyun oylarida ko‘chmas mulk huquqini himoya qilish bo‘yicha aksiya o‘tkazilgan. Aksiya doirasida murojaatlarni ko‘rib chiqishda 874 ta qonunbuzilish holati aniqlangan. Natijada mulkdorlarning manfaatlarida 236 ta taqdimnoma, 100 ta ogohnoma, sudlarga 360 ta da’vo arizalari kiritilib, 30,3 milliard so‘m undirib berilgan. “Bu natijalar albatta xamir uchidan patir yoki dengizdan bir tomchidek gap”, — deyiladi vazirlik axborotida.
Mulk daxlsizligini ta’minlamasdan iqtisodiy rivojlangan davlatning o‘zi yo‘q butun dunyoda. Bu esa bizning qonunlarimizda bitilgan eng oliy normalardan biridir va barcha munosabatlar to‘laligicha tartibga solingan. Lekin amalda ushbu tartib va qoidalar mutasaddilarning esidan chiqib ketdi. Natijada uy-joy masalasida qonun ustuvorligiga jiddiy putur yetdi.Amaliyotdagi muammolardan, bildirilgan fikr mulohazalardan kelib chiqib vazir Ruslanbek Davletov adliya organlari xodimlari oldida turgan muhim vazifalar alohida to‘xtalib, quyidagilarni bildirdi:Bu nima degan gap? Odamlarning uyini buzib, ko‘chaga chiqarib qo‘yib, kompensatsiya to‘lamaslik — axir bu vahshiylik-ku. Bu hech qanday qonunchilikka to‘g‘ri kelmaydi, bu hech bir odamiylik tamoyiliga ham to‘g‘ri kelmaydi, bu O‘zbekiston tan olgan xalqaro hujjatlarga ham to‘g‘ri kelmaydi!
Hamma shaharlar yangidan quriladi, eskisi buziladi, obodonlashadi, bu tabiiy jarayon, barcha jamiyatlarga xos bo‘lgan holat. Lekin, XXI asrda yashayotgan sivilizatsion jamiyat sifatida barcha harakatlar uchun qonun eng asosiy mezon bo‘lishi kerak, odamlar huquqlarini poymol qilish evaziga, qonunni buzish evaziga hech qanday qurilish yoki obodonlashtirish bo‘lishi mumkin emas...
...Keyin yana bir jihatni e’tiborga olinglar — gap faqat moddiy boylik bo‘lmish imoratda emas, uy-joy bilan insonlarning shu uy bilan bog‘liq xotiralari ham o‘chiriladi. Tug‘ilib o‘sgan joy, yoshlikda o‘ynab kulib yurgan hovli, bolalikdagi xotiralar, kerak bo‘lsa har bir xonadonning hidi inson uchun qadrli, ko‘p uylar avloddan avlodga o‘tib kelyapti, bu yuksak shaxsiy nomoddiy boylik va inson hayotidagi ajralmas xotiralardir.
Ruslanbek Davletov, adliya vaziri
Ruslanbek Davletov, adliya vaziri
- Barcha mahalliy hokimliklarni fuqarolarni uy-joy bilan bog‘liq qonuniy huquqlarini poymol etishlarga chek qo‘yishlarini talab qilamiz;
- Butun adliya tizimi rahbarlari, mutasaddilari va xodimlarini o‘z vakolatlaridan to‘liq foydalangan holda, uy-joylar buzilishi jarayonida O‘zbekiston qonunlariga amal qilish yuzasidan choralar ko‘rishlariga chaqiraman.
Izoh (0)