Toshkent shahar hokimligida Janubiy Koreya delegatsiyasi bilan uchrashuv bo‘lib o‘tdi. Unda “Integratsiyalashgan jamoat transporti strategiyasini rivojlantirish va qo‘llab-quvvatlash” mavzusi muhokama etildi. Bu haqda hokimlik matbuot xizmati ma’lum qildi.
O‘zaro muloqot davomida Toshkent shahar hokimi Jahongir Ortiqxo‘jayev poytaxt uchun transport infratuzilmasini takomillashtirish, bu yo‘nalishda xizmat ko‘rsatishni zamon talablari darajasiga ko‘tarish muhimligi va bu borada ilg‘or davlatlar tajribasi o‘rganilganini qayd etdi.
Shuningdek, bu borada Janubiy Koreyaning import va eksport banki mutaxassislari bilan hamkorlikda ishlar boshlanganligini ma’lum qilib, mazkur uchrashuv birgalikdagi ishlarning amaliy natijalardan biri ekanligini ta’kidladi.
Uchrashuvda Koreya Eksimbanki tomonidan Toshkent shahar transport infratuzilmasi uchun yangi konsepsiya taqdim etildi.
Mazkur konsepsiyada Toshkentda jamoat transporti yo‘nalishlarini ko‘paytirish va shu orqali shaxsiy avtotransport harakatini kamaytirish taklif etilgan. Koreyalik mutaxassislarning ahamiyatli takliflaridan yana biri tezyurar avtobus yo‘nalishlarini tashkil etish bo‘lib, bu shahar ichida bir manzildan ikkinchisiga tez, oson va qulay yetib olishni ta’minlaydi.
Konsepsiyada mazkur tizimda xususiy tarmoq ishini rivojlantirish kabi qator tashabbuslar ilgari surilgan bo‘lib, endi shahar hokimligi poytaxt jamoat transportiga mas’ullar bilan birgalikda ushbu takliflarni hayotga joriy etish masalalarini ko‘rib chiqadi.
Izoh (0)