Yevropa Ittifoqi afg‘on ayollariga O‘zbekiston va Qozog‘iston universitetlarida o‘qish imkonini beruvchi loyihaga 2 million yevro grant ajratdi, deb yozmoqda Repost YeI vakilligi xabariga tayanib.
Unga ko‘ra, Qozog‘iston va O‘zbekiston o‘quv yurtlarida 2025-yilgacha qishloq xo‘jaligi, amaliy statistika va tog‘-konchilik sohasidagi bakalavr, magistratura hamda qishloq xo‘jaligi bo‘yicha texnik mutaxassislik yo‘nalishlari bo‘yicha 50 nafar talaba ta’lim oladi.
Loyiha hamkori sifatida “BMT-ayollar” tuzilmasi tadbirkorlik va tarmoq ko‘nikmalarini o‘rgatish maqsadida yozgi maktablar ham tashkillashtiradi. Bu esa ishtirokchilarning kelajakda ish bilan ta’minlanishi va shu orqali ularning iqtisodiy huquq va imkoniyatlarining kengayishiga yordam beradi.
Ushbu tashabbus ayollarning ishbilarmonlik faoliyati va ularning bandligini ta’minlashda, shuningdek Afg‘onistonda o‘z jamoalarini shakllantirishda yangi imkoniyatlar yaratishi kutilmoqda.
BMT Taraqqiyot dasturining 2018-yilgi insoniyat taraqqiyoti to‘g‘risidagi hisobotiga ko‘ra, Afg‘onistondagi barcha katta yoshdagi ayollarning 11 foizi o‘rta ma’lumot olgan va ularning 19,5 foizi ishga joylashgan xolos. Afg‘on erkaklari orasida esa bu ko‘rsatkich tegishli ravishda 37 va 87 foizni tashkil etadi. 2016—2017-yillarda Afg‘oniston aholisining yarmidan ko‘pi qashshoqlikda yashagan.
Izoh (0)