Қашқадарёда аҳолини электр токи билан таъминловчи мавжуд 8884 та трансформаторнинг 65 фоизи яроқсиз ҳолга келиб қолган. Бу ҳақда Қарши шаҳридаги «Афсона» меҳмонхонасида Қашқадарё ҳудудий электр тармоқлари Акциядорлик жамияти раҳбарияти билан бўлиб ўтган мулоқотда маълум қилинди.
Матбуот анжуманида айтилишича, Қашқадарё вилоятида айни кунда жами 660 минг электр истеъмолчиси мавжуд бўлиб, истеъмолчиларга 27 048 км электр тармоқлари орқали электр токи узатилади. Энг ёмони мазкур электр тармоқларининг 60 фоизи ҳам эскирган бўлиб, янгилашга муҳтож.
Қашқадарё ҳудудий электр тармоқлари АЖ раҳбари Анвар Музаповнинг журналистларга маълумот беришича, айни кунда Ўзбекистонда 1 кВ электр энергиясини ишлаб чиқариш учун 450 сўм маблағ сарфланади. Аммо аҳоли 1 кВ электр энергияси учун 250 сўм пул тўлайди. Мутасаддининг қўшимча қилишича, Ўзбекистонда электр энергияси учун тўлов бошқа мамлакатларга нисбатан сезиларли даражада арзон. Қўшни Тожикистон республикасида аҳоли 1 кВ электр энергияси учун 380 сўм миқдорда пул тўласа, Россия аҳолиси 1кВ электр энергияси учун 379 сўм миқдорда ҳақ тўлар экан.
Давлат раҳбарининг 2018 йил декабрь ойидаги вилоятга ташрифи чоғида берилган топшириқлар режасига кўра, Қашқадарё ҳудудий электр тармоқлари томонидан 730 км электр тармоқлари ва 230 та трансформатор пунктларини реконструкция ва модернизация қилиши лозимлиги белгиланган бўлиб, 1960 км узунликдаги электр тармоқлари ва 655 дона трансформатор пунктларини мукаммал таъмирлаш режалаштирилган.
— Айни кунга қадар 426,2 км электр тармоқлари ва 151 дона трансформатор пунктлари реконструкция ва модернизация қилинди, — дейди Қашқадарё ҳудудий электр тармоқлари АЖ матбуот хизмати раҳбари Муродулла Комилов. – Шунингдек, 1565 км узунликдаги электр тармоқлари ва 521 дона трансформатор пунктлари мукаммал таъмирланди.
Матбуот анжуманида журналист ва блогерлар ўзини қизиқтирган саволларга жавоб олди.
Қашқадарё ҳудудий электр тармоқлари АЖ раҳбари Анвар Музапов «Дарё» мухбирининг Ғузор туман электр тармоқлари корхонасида электр энергияси учун пластикка пул тўлангач, пулни «загрузка» қилиш аҳолига муаммо туғдираётгани, фуқаролар 4–5 соатлаб вақтини «загрузка» учун сарфлаётгани хусусида «Дарё» таҳририятида мақола чоп этилганини ва мазкур чиқишга масъуллар нима учун ҳеч қандай муносабат билдирмагани ҳақида сўради.
— Электр энергияси учун тўланган пулни пластикка «загрузка» қилиш муаммоси нафақат Ғузорда вилоятнинг барча туманлари, ҳатто Қарши шаҳрида ҳам бор, — дейди Анвар Музапов. – Бунинг олдини олиш учун ҳаракат қилинди, албатта. Ўша мақоладан сўнг, Ғузор тумани аҳолиси учун «загрузка» аппарати ҳам олиб келинди. Аммо бу муаммонинг ечими бўлолмади. Шунинг учун бу борада қулайлик яратилди. Режага кўра, 2020 йилга қадар дастлаб Қарши шаҳри аҳолиси учун 60 минг дона янги электр ҳисоблагич сотиб олиб, аҳолига бепул тарқатишни мўлжал қиляпмиз. Янги электр ҳисоблагичнинг қулай томони шундан иборатки, ҳисобига пул тушгач, электр энергияси узатишни бошлайди. Пул тугагач, ўчади. Худди телефонимизга пул тўлаганимизда тўғридан тўғри ишлаб кетгани каби, бу электр ҳисоблагич ҳам пул тўлангач ишлаб кетади. «Загрузка» деган муаммо бўлмайди.
Анвар Музаповга кўра, электр энергиясини ҳисобга олиш ва назорат қилишнинг автоматлаштирилган тизимига ўтишини таъминловчи мазкур электр ҳисоблагичларнинг айни кундаги нархи 784 минг сўм туради. Вилоят бўйича 660 мингта истеъмолчига худди шундай электр ҳисоблагич харид қилиш учун маҳаллий бюджет ҳисобидан 600 миллиард сўм пул ажратилган.
Изоҳ (0)