Qashqadaryo viloyatida 2019-yilning 6 oyi mobaynida ayollar o‘rtasidagi jinoyatchilik o‘tgan yilning shu davriga nisbatan 117 tadan 87 taga kamaygan. Bu haqda Qashqadaryo viloyati IIB Huquqbuzarliklar profilaktikasi boshqarmasi va viloyat xotin-qizlar qo‘mitasi hamkorligida o‘tkazilgan davra suhbatida ma’lum qilindi.
Viloyat IIB Huquqbuzarliklar profilaktikasi boshqarmasi boshlig‘i, mayor Nosir Nazarovning ma’lum qilishicha, xotin-qizlar tomonidan sodir etilgan jinoyatlarning asosiy qismini o‘g‘rilik, firibgarlik va giyohvandlik bilan bog‘liq bo‘lgan jinoyatlar tashkil qilgan. Jinoyat sodir qilgan 119 nafar ayolning 80 nafari yoki 67,2 foizini 30 yoshdan oshganlar, 38 nafari yoki 31,9 foizini 18–30 yoshgacha bo‘lganlar, 1 nafari yoki 0,8 foizini 18 yoshgacha bo‘lganlar tashkil etadi.
Tadbirda so‘z olgan viloyat hokimi o‘rinbosari, xotin-qizlar qo‘mitasi raisi Maqsuda Mustafoyeva bugun ayollar bilan ishlash, ularning og‘irini yengil qilish davr talabi ekanligini ta’kidlab, ayollar jinoyatchiligining oldini olish borasida huquqbuzarliklar profilaktikasi boshqarmasi bilan hamkorlik naqadar muhim ekanligini ta’kidladi. Viloyatda ayollar bilan ishlashda tuman xotin-qizlar qo‘mitasi faoliyatiga to‘xtalib, Nishon tuman xotin-qizlar qo‘mitasi faoliyati namunali ekanligini ta’kidladi. Nishon tuman FHDYo mudirasi faoliyatini esa tanqid qildi.
Tadbirda shuningdek viloyatda 22 nafar xotin-qizlar bilan ishlash bo‘yicha katta inspektorlar faoliyat boshlagani ma’lum qilinib, ular tuman xotin-qizlar qo‘mitasi rahbarlariga tanishtirildi.
Viloyat IIBda bo‘lib o‘tgan tadbir davomida esa 22 nafar xotin-qizlar bilan ishlovchi katta inspektorlarga kompyuter jamlanmasi, xizmat telefoni va sim-kartalar topshirildi.
Izoh (0)