O‘zbekiston Milliy axborot agentligi “O‘rda” MFY fuqarolari muallifligidagi maqolani e’lon qildi. Uni to‘lig‘icha keltirib o‘tamiz.
Bugungi kunda Toshkent aholisini qiynayotgan eng dolzarb masalalardan biri buzilish ishlari bo‘lsa ajab emas.
Kuni kecha Shayxontohur tumanining Anhor sohilbo‘yi ko‘chasida 8-ko‘pqavatli uyning kadastr hujjatiga kiritilgan garajlar tuman hokimiyati tomonidan buzdirib tashlandi va bu ishlar davom etmoqda. Garajlar buzilishi qanchalik asosli bo‘lmasin, mazkur ishlar aholini ogohlantirish, hujjatga ega garajlar bo‘lsa qonunda ko‘rsatilganidek tovon pullari to‘lab, amalga oshirilishi kerak. Huquq tartibot organlari xodimlari bilan aholining noroziliklariga qaramasdan garajlarni buzib tashlashi qanchalik o‘rinli?
Anhor sohilbo‘yi ko‘chasiga tuman hokimiyati mas’ullari huquq tartibot xodimlari bilan kelib, buzishga qarshilik qilgan erkaklarga “15 sutkaga qamaymiz”, deya qo‘rqitdi. Aholida garajlar uchun hujjat bor, mazkur garajlar ko‘p qavatli uy kadastr hujjatlariga kiritilgan va ular uchun ham soliq to‘lab kelgan. “O‘rda” MFY raisi esa garajlarning birontasini ham hujjati yo‘qligini ta’kidlaydi. Biroq, 8-ko‘p qavatli uyning egalari qo‘llarida uy kadastr hujjatiga kiritilgan garajlarga egalik qilishgan va ularga yaqingacha to‘lovlar to‘lab kelingan. Tuman hokimiyatidan keldik, deb o‘zlarini tanishtirib, garaj eshiklarini buzgan odamlar aholiga tegishli hujjatlarni taqdim etmaganlar. Hamda aholi qarshiligini bostirish uchun bir qancha (bir “SamAvto”) huquq tartibot organi xodimlari bilan kelganlar.
Garajlar buzilayotgan vaqtda ular qulflangan va ularda aholiga tegishli buyumlar bo‘lgan. Buyumlarga tegilmagan bo‘lsa-da, garajlar eshiklari buzilib ochiq holda qoldirilgan. Nahotki aholi bilan kelishib, tushuntirish ishlari olib borgan holda qonuniy yo‘l bilan garajlarni tartibga solishning iloji bo‘lmasa?
Bunday holatda bostirib kelib, shaxsiy mulklar joylashgan garajlarga tajovuz qilish aholida hokimiyatga nisbatan norozilik kayfiyatini uyg‘otmaydimi?
Mayli, balki garajlarning ba’zisi hujjatli, qaysilariningdir hujjati yo‘qdir. Lekin, ularning qulflangani, ichida shaxsiy buyumlar turgani ularga tajovuz qilish mumkin emasligini bildirmaydimi?
Bugungacha Toshkent shahrida qancha garajlar buzib tashlandi, o‘rnini so‘lim bolalar o‘yingohlari, usti ochiq avtoturargohlar egalladi. Bularning deyari ko‘pchiligi aholi bilan kelishgan holda, ularning xohish irodalari inobatga olib amalga oshirilgan bo‘lsa kerak. Garajlarni buzishga kelgan idora xodimlari garaj o‘rnini obod qilish uchun aholi o‘z yonidan xarajat qilishi lozimligini bildirdi.
Modomiki, tuman hokimliklari aholiga xizmat qiluvchi davlat organi ekan, buzilish ishlarini aholi bilan kelishgan holda, qonuniy va tartibli yo‘l bilan bajarsa to‘g‘ri bo‘lardi.“O‘rda” MFY fuqarolaridan
Izoh (0)