Тошкентда бузиб ташланаётган гаражлар ёхуд Анҳор соҳилбўйи кўчаси аҳолиси нимадан норози?

Ўзбекистон Миллий ахборот агентлиги «Ўрда» МФЙ фуқаролари муаллифлигидаги мақолани эълон қилди. Уни тўлиғича келтириб ўтамиз.

Бугунги кунда Тошкент аҳолисини қийнаётган энг долзарб масалалардан бири бузилиш ишлари бўлса ажаб эмас.

Куни кеча Шайхонтоҳур туманининг Анҳор соҳилбўйи кўчасида 8-кўпқаватли уйнинг кадастр ҳужжатига киритилган гаражлар туман ҳокимияти томонидан буздириб ташланди ва бу ишлар давом этмоқда. Гаражлар бузилиши қанчалик асосли бўлмасин, мазкур ишлар аҳолини огоҳлантириш, ҳужжатга эга гаражлар бўлса қонунда кўрсатилганидек товон пуллари тўлаб, амалга оширилиши керак. Ҳуқуқ тартибот органлари ходимлари билан аҳолининг норозиликларига қарамасдан гаражларни бузиб ташлаши қанчалик ўринли?

Анҳор соҳилбўйи кўчасига туман ҳокимияти масъуллари ҳуқуқ тартибот ходимлари билан келиб, бузишга қаршилик қилган эркакларга «15 суткага қамаймиз», дея қўрқитди. Аҳолида гаражлар учун ҳужжат бор, мазкур гаражлар кўп қаватли уй кадастр ҳужжатларига киритилган ва улар учун ҳам солиқ тўлаб келган. «Ўрда» МФЙ раиси эса гаражларнинг биронтасини ҳам ҳужжати йўқлигини таъкидлайди. Бироқ, 8-кўп қаватли уйнинг эгалари қўлларида уй кадастр ҳужжатига киритилган гаражларга эгалик қилишган ва уларга яқингача тўловлар тўлаб келинган. Туман ҳокимиятидан келдик, деб ўзларини таништириб, гараж эшикларини бузган одамлар аҳолига тегишли ҳужжатларни тақдим этмаганлар. Ҳамда аҳоли қаршилигини бостириш учун бир қанча (бир «СамАвто») ҳуқуқ тартибот органи ходимлари билан келганлар.

Гаражлар бузилаётган вақтда улар қулфланган ва уларда аҳолига тегишли буюмлар бўлган. Буюмларга тегилмаган бўлса-да, гаражлар эшиклари бузилиб очиқ ҳолда қолдирилган. Наҳотки аҳоли билан келишиб, тушунтириш ишлари олиб борган ҳолда қонуний йўл билан гаражларни тартибга солишнинг иложи бўлмаса?

Бундай ҳолатда бостириб келиб, шахсий мулклар жойлашган гаражларга тажовуз қилиш аҳолида ҳокимиятга нисбатан норозилик кайфиятини уйғотмайдими?

Майли, балки гаражларнинг баъзиси ҳужжатли, қайсиларинингдир ҳужжати йўқдир. Лекин, уларнинг қулфлангани, ичида шахсий буюмлар тургани уларга тажовуз қилиш мумкин эмаслигини билдирмайдими?

Бугунгача Тошкент шаҳрида қанча гаражлар бузиб ташланди, ўрнини сўлим болалар ўйингоҳлари, усти очиқ автотураргоҳлар эгаллади. Буларнинг деяри кўпчилиги аҳоли билан келишган ҳолда, уларнинг хоҳиш иродалари инобатга олиб амалга оширилган бўлса керак. Гаражларни бузишга келган идора ходимлари гараж ўрнини обод қилиш учун аҳоли ўз ёнидан харажат қилиши лозимлигини билдирди.

Модомики, туман ҳокимликлари аҳолига хизмат қилувчи давлат органи экан, бузилиш ишларини аҳоли билан келишган ҳолда, қонуний ва тартибли йўл билан бажарса тўғри бўларди.«Ўрда» МФЙ фуқароларидан