Avval xabar berganimizdek, 20-iyul kuni taxminan soat 21:50da Buxoro viloyati, Shofirkon tumanining cho‘l hududidan o‘tuvchi Zirabuloq magistral gazquvur liniyasi (“Gazli—Chimkent” yo‘nalishidagi) yuqori bosimli gaz quvurining 76-kilometrida yorilish sodir bo‘lgan.
FVV matbuot xizmatiga ko‘ra, gaz quvurida sodir bo‘lgan favqulodda holat paytida quvurda gaz bosimi 33-34 atmosferani tashkil qilib, ushbu holat gaz quvurining payvand choki ochilib ketishi oqibatida yuzaga kelgan. Natijada zararlangan quvurdan gaz sizib chiqishi hamda keyinchalik ishqalanishidan alangalanish sodir bo‘lgan.
Gaz sizib chiqishini to‘xtatish maqsadida gaz quvurining 73 va 100-kilometrlarida gaz tarmog‘i o‘chirilgan. Sodir bo‘lgan favqulodda vaziyat joyi eng yaqin aholi punktidan taxminan 45-50 kilometr uzoqlikda joylashgan bo‘lib, jabrlanganlar va halok bo‘lganlar yo‘q.
Yuzaga kelgan favqulodda vaziyatni bartaraf etish ishlariga “O‘ztransgaz” AJ avariya-tiklash guruhlarining 15 nafar shaxsiy tarkibi va 12 ta maxsus texnika jalb etilib, hozirda yorilgan gaz quvurida ta’mirlash-tiklash ishlari olib borilmoqda.
Shuningdek, voqea joyiga viloyat Favqulodda vaziyatlar boshqarmasi, FVB YoXB va Milliy gvardiya rahbarlari yetib borgan.
Izoh (0)