Andijon shahrida “Namunali hudud” tajribasini yaratish bo‘yicha olib borilayotgan tadbirlar doirasida, Andijon shahar Ichki ishlar organlari Faoliyatini muvofiqlashtirish boshqarmasining 1, 2, 3, 4, 5, 6-sonli ichki ishlar bo‘limlarida jami 6 ta “Vaziyatlarni nazorat qilish markazlari” faoliyati tashkil etildi. Bu haqda “Daryo”ga viloyat ichki ishlar boshqarmasi matbuot xizmati xabar berdi.
Ta’kidlanishicha, “Vaziyatlarni nazorat qilish markazlari”ni tashkil etish davomida kriminogen jihatdan og‘ir bo‘lgan hududlar, bozorlar hamda jinoyat sodir etishga moyil shaxslar to‘planishi mumkin bo‘lgan maskanlar va huquqbuzarliklar ko‘p sodir etiladigan joylar o‘rganilib chiqilgan.
Har bir IIB hududiga o‘rnatilgan umumiy 286 dona yuqori tiniq tasvirga tushirishga ega bo‘lgan, kun-u tun rejimida ishlovchi hamda yuz qiyofa orqali shaxsini aniqlovchi 12 dona videokuzatuv kameralari “Vaziyatlarni nazorat etish markazlari”ga ulangan.
Qayd etilishicha, video kuzatuv moslamalari yordamida mast holda jinoyat va huquqbuzarlik sodir etishga shubha uyg‘otgan 17 nafar shaxslar aniqlanib, hodisa joylariga zudlik bilan IIB xodimlarining yuborilishi natijasida hududlarda sodir etilishi mumkin bo‘lgan jinoyatlarning oldi olingan.
Izoh (0)