2020-yilning oxiriga qadar O‘zbekistondagi barcha iste’molchilar, shuningdek, tadbirkor va xususiy biznes egalari “aqlli” elektr hisoblagichlar bilan ta’minlanadi, deb xabar berdi “Podrobno”.
Ayni vaqtda butun mamlakat bo‘ylab 950 mingdan ortiq shu turdagi qurilmalar ishlamoqda, keyingi yilning oxiriga qadar esa yana 7 milliondan ortiq hisoblagich o‘rnatiladi. Zamonaviy hisoblagichlarning aksariyati “Elektron hisoblagich” va “Toshelektroapparat” mahalliy ishlab chiqaruvchilari tomonidan yetkazib berilmoqda. Ushbu qurilmalar o‘zidan oldingi hisoblagichlardan farqli o‘laroq 20 dan ortiq funksiyani bajara oladi.
Hisoblagich o‘rnatilishi bilan avtomatlashtirilgan nazorat tizimi va elektr energiyasi hisobiga ulanadi. Dasturning o‘ziga xos jihatlaridan biri — iste’molchini SMS-xabarnoma orqali avtomatik ravishda pul tushirish haqida ogohlantiraladi.
Buning uchun iste’molchi o‘zining mobil raqamini “Elektrhisoblagich” dasturiga ulashi lozim, bu esa o‘z navbatida to‘lovlarni uydan chiqmasdan turib onlayn rejimida amalga oshirish imkonini beradi. Ta’kidlash kerakki, har bir iste’molchi o‘zining “shaxsiy kabineti” orqali iste’mol qilingan elektr energiyasi haqida batafsil ma’lumotga ega bo‘lishi mumkin.
Yangi tizimda hisoblagich ko‘rsatkichlari kompyuter tomonidan nazorat qilinadi. Shu sababli elektr ta’minoti bilan shug‘ullanuvchi tashkilotlarning xodimlari uyma-uy yurmasdan turib hisoblagichlarni nazorat qila oladi.
Bundan tashqari “aqlli” elektr hisoblagich iste’mol qilingan elektr energiyasini hisoblashda, ma’lumotlarni yig‘ish va qayta ishlashda, ishonchlilikni ta’minlash va tezkorlik bilan ishlashda inson omilining ta’sirini kamaytiradi.
Shuningdek, ushbu hisoblagichlarga iste’molchi tomonidan biror-bir tashqi ta’sir o‘tkazishga urinilganida u avtomatik ravishda o‘chadi va bu haqda tizimga xabar beradi. O‘z vaqtida pul to‘lanmasa ham elektr energiyasini uzatish avtomatik rejimda to‘xtatiladi.
Yangi hisoblagichlar har 10 yilda davlat nazoratidan o‘tkaziladi. Har biri 770 ming turadigan elektr hisoblagich qurilmalar iste’molchilarga bepul o‘rnatib beriladi.
Izoh (0)