O‘zbekiston Axborot va ommaviy kommunikatsiyalar agentligi direktori o‘rinbosari Saida Mirziyoyeva I.V.Savitskiy nomidagi Davlat san’at muzeyi direktori lavozimiga tanlovda yutib chiqqan xalqaro ekspert Tigran Mkrtichevga katta ishonch bildirdi. Bu haqda u ijtimoiy tarmoqlardagi sahifalarida yozdi.
O‘zbekiston Respublikasi Prezidentining qarori bilan tasdiqlangan Muzeylar renovatsiya dasturiga muvofiq yaqinda Nukusda joylashgan I.V.Savitskiy nomidagi Davlat san’at muzeyi direktori lavozimiga xalqaro tanlov o‘tkazildi.Tanlovda san’atshunoslik fanlari doktori, Rossiya Federatsiyasida xizmat ko‘rsatgan madaniyat xodimi, 20 dan ortiq xalqaro ko‘rgazmalar kuratori, muzey ishi sohasidagi xalqaro ekspert Tigran Mkrtichev g‘alaba qozondi.
Ushbu muzey mamlakatimizdagi eng yiriklardan biri bo‘lib, haqli ravishda “sahrodagi Luvr” nomi bilan mashhur. Ushbu dargohda rus avangardiga mansub asarlarning ahamiyati va hajmiga ko‘ra jahonda ikkinchi sanalgan kolleksiya hamda Osiyo qit’asidagi eng namunali deb hisoblangan badiiy kolleksiya saqlanadi.
Muzeylarda rahbar lavozimlariga tayinlashda yangi — ochiq tanlov o‘tkazish amaliyoti qo‘llanayotgani alohida e’tiborga molik. Bunday muhim qarorlarni qabul qilishda ochiqlik va shaffoflikka rioya qilinishi adolatli ravishda munosib nomzodni tanlashga xizmat qiladi.
Muzey faoliyatida yangi sahifa ochilayotganiga, uning noyob kolleksiyasi asrab-avaylab saqlanishiga xizmat qiladigan yangi taraqqiyot bosqichi boshlanganiga ishonchim komil.
Hurmatli Tigran Konstantinovichni tayinlov bilan muborakbod etib, muzeyni rivojlantirish yo‘lida muvaffaqiyatlar va yorqin ijodiy zafarlar tilab qolaman!
Saida Mirziyoyeva
Izoh (0)