Malayziya prokuraturasi “Uoll-stritlik bo‘ri” filmi bilan mashhur bo‘lgan kinoprodyuser Riza Azisga jinoiy daromadlarni qonuniylashtirish (“pul yuvish”) ayblovi qo‘yildi. Bu haqda “TASS” xabar berdi.
Riza Azis 1MDB davlat investitsiya fondi mablag‘larini talon-toroj qilish bilan bog‘liq korrupsiya mojarosiga aloqadorligi sababli tergovga tortilgan Malayziya sobiq bosh vaziri Najib Razakning o‘gay o‘g‘lidir.
Malayziya huquq-tartibot organlari prodyuserni ham fonddan “pullarni yuvish”da aloqador deb hisoblanmoqda. U 248 million dollarni noqonuniy o‘zlashtirib olgan deb taxmin qilinayotgan 5 ta epizodda ayblanmoqda. Amerikaning Red Granite Pictures prodyuserlik va distribyutorlik kompaniyasi asoschilaridan biri bo‘lgan Riza Azis bu ayblovlarni rad etmoqda.
Fond ishi bo‘yicha 2011-yilda boshlangan tergov harakatlari yopilgan bo‘lib, 2015-yilda qayta ochilgan edi. Ammo Najib Razak hukmronligi davrida ish yana yopilgan. Saylovlarda “Umid alyansi” muholifat koalitsiyasi g‘alaba qozonganidan keyin tergov hukumat tomonidan qayta ochilgan.
Najib Razak oilasiga tegishli bo‘lgan uyda 2018-yilning may oyi oxirlarida olib borilgan tintuv davomida 28,6 million dollar naqd pul va umumiy qiymati 109 million dollardan ortiq bo‘lgan zargarlik buyumlari topilgan. Uning hisob raqamida esa 1MDB fondidan o‘tkazilgan ma’lum miqdordagi pullar borligi aniqlangan.
Riza Azis 4-iyul kuni Malayziyada qo‘lga olingan, so‘ng garov evaziga qo‘yib yuborilgan.
Izoh (0)