Малайзия прокуратураси «Уолл-стритлик бўри» фильми билан машҳур бўлган кинопродюсер Риза Азисга жиноий даромадларни қонунийлаштириш («пул ювиш») айблови қўйилди. Бу ҳақда «ТАСС» хабар берди.
Риза Азис 1MDB давлат инвестиция фонди маблағларини талон-торож қилиш билан боғлиқ коррупция можаросига алоқадорлиги сабабли терговга тортилган Малайзия собиқ бош вазири Нажиб Разакнинг ўгай ўғлидир.
Малайзия ҳуқуқ-тартибот органлари продюсерни ҳам фонддан «пулларни ювиш»да алоқадор деб ҳисобланмоқда. У 248 миллион долларни ноқонуний ўзлаштириб олган деб тахмин қилинаётган 5 та эпизодда айбланмоқда. Американинг Red Granite Pictures продюсерлик ва дистрибюторлик компанияси асосчиларидан бири бўлган Риза Азис бу айбловларни рад этмоқда.
Фонд иши бўйича 2011 йилда бошланган тергов ҳаракатлари ёпилган бўлиб, 2015 йилда қайта очилган эди. Аммо Нажиб Разак ҳукмронлиги даврида иш яна ёпилган. Сайловларда «Умид альянси» муҳолифат коалицияси ғалаба қозонганидан кейин тергов ҳукумат томонидан қайта очилган.
Нажиб Разак оиласига тегишли бўлган уйда 2018 йилнинг май ойи охирларида олиб борилган тинтув давомида 28,6 миллион доллар нақд пул ва умумий қиймати 109 миллион доллардан ортиқ бўлган заргарлик буюмлари топилган. Унинг ҳисоб рақамида эса 1MDB фондидан ўтказилган маълум миқдордаги пуллар борлиги аниқланган.
Риза Азис 4 июль куни Малайзияда қўлга олинган, сўнг гаров эвазига қўйиб юборилган.
Изоҳ (0)