O‘zbekiston va Afg‘oniston qurilayotgan “Surxon — Puli-Xumri” elektr uzatish liniyasi orqali “ol va to‘la” tamoyili bo‘yicha elektr energiyasini yetkazib berishga shartnoma imzolamoqda. Bu haqda o‘tgan hafta juma kuni bo‘lib o‘tgan Energetika vazirligi brifingida energetika vaziri o‘rinbosari Sherzod Xo‘jayev ma’lum qildi.
Quvvati 500 kV bo‘lgan elektr uzatish tarmog‘i qurilishi to‘g‘risida 2017-yil dekabrida Afg‘oniston prezidenti Ashraf G‘anining O‘zbekistonga tashrifi vaqtida bitim imzolangan edi.
O‘zbekiston hududida qurilish ishlari 2018-yil martida boshlandi. Tarmoqning uzunligi 260 kilometr bo‘lib, O‘zbekistondan Afg‘onistonga yetkazib berilayotgan elektr energiyasi hajmini 70 foizga oshirish va yiliga 6 milliard kilovatt soatga yetkazish imkonini beradi. 150 million dollarga mo‘ljallangan loyihani 2020-yil oxirigacha yetkazish rejalashtirilgan.
Osiyo taraqqiyot banki Afg‘onistonga O‘zbekiston bilan energiya almashinuvi uchun kredit ajratdi.
Izoh (0)