Qashqadaryo hokimi 53 nafar fidoyi jurnalistni viloyatda ishlab chiqarilayotgan televizorlar bilan taqdirladi

27-iyun kuni Qashqadaryo viloyati hokimligida Matbuot va ommaviy axborot vositalari xodimlari kuni munosabati bilan 53 nafar fidoyi jurnalistni taqdirlash marosimi bo‘lib o‘tdi. Bu haqda “Daryo” muxbiri xabar beryapti.

“Daryo” muxbiriga ko‘ra, tadbirda so‘z olgan viloyat hokimi Zafar Ro‘ziyev viloyatda faoliyat yuritayotgan jonkuyar jurnalistlarni bayram munosabati bilan samimiy muborakbod etib, qalam ahlining mehnatini qadrlashini ta’kidlab o‘tgan.

— Siz aziz jurnalistlarni qancha tabriklasak, qutlasak kam, — dedi viloyat hokimi Zafar Ro‘ziyev. – Boisi, ushbu kasb egalari shunga munosib. Jurnalistlik o‘ta mashaqqatli kasb ekanligini dildan his etamiz. Va sizning mehnatingizni doimo qadrlaymiz.

Zafar Ro‘ziyev tadbir davomida viloyatda faoliyat yuritib kelayotgan jurnalistlarning 53 nafarini fidoyiligi, viloyatning ijtimoiy-iqtisodiy hayotidagi faol ishtirokini alohida ta’kidlab, jurnalistlarning har biriga Qarshi shahrida ishlab chiqarilayotgan televizorlardan sovg‘a qildi. Taqdirlangan faol jurnalistlar orasida “Daryo” muxbiri Otabek Qo‘ldoshev ham bor.

Tadbir bir piyola choy ustida davom etdi.