Бугун, 28 июнь куни Ахборот ва оммавй коммуникациялар агентлигида бўлиб ўтган матбуот анжуманида Ўзбекистон Энергетика вазирининг биринчи ўринбосари, «Ўзатом» агентлиги директори Жўрабек Мирзамаҳмудов мамлакатда илк АЭС қурилиши режалаштирилаётган Тузкон кўли хавфсизлиги масаласида маълумот берди. Бу ҳақда «Дарё» мухбири Севара Нишонова хабар берди.
«Биз қанча сув кераклиги ва сувдан қандай фойдаланилиши ҳақида жуда кўп гапирдик. Буғни ишлаб чиқиш, электр энергиясини генеранация қилиш, совитиш учун АЭС томонидан сарф қилинадиган сув миқдори бизнинг ҳозирги иссиқлик электр станцияларимиздаги сув сарфидан кўп эмас. Айни вақтда атроф-муҳитни ифлослантирадиган ажратмалар, оқинди сувлар бўлмайди.
Венгриядаги қуввати 440 мегаватт бўлган ва ССER технологияси қўлланиладиган АЭСда сув Дунай дарёсидан олиниб, яна унинг ўзига оқизилади — бунда экологияга ҳеч қандай таъсир бўлмайди. У ерда бемалол балиқ овлашади — АЭС шарофати билан сув илиқлашиб, у ерда балиқлар аввалгидан ҳам кўпайган», — деди Жўрабек Мирзамаҳмудов.
«Ўзатом» раҳбарининг таъкидлашича, ҳозирда агентлик АЭСнинг атроф-муҳитга таъсирини баҳолаш юзасидан Давлат экология қўмитаси билан ҳамкорликда иш олиб бормоқда:
«Тузкон Рамсар конвенциясига киришини биламиз, бу борада Давлат экология қўмитаси билан бирга ишлаяпмиз. Атроф-муҳитга таъсирни баҳолаш бўйича ишлар бошланганини бир неча бор маълум қилдик, у барча зарурий ҳисоб-китобларни ўз ичига олади, экспертизалар ўтказилади».
«АЭСдан ташқаридаги соҳил бўйида яшаш, ишлаш, чўмилиш, суратга тушиш мумкин бўлади... Албатта, бутун дунёда бўлгани сингари, бу ерда ҳам туркумлаштирилган объэктларга хос чекловлар бўлади», — дейди Мирзамаҳмудов.
Жўрабек Мирзамаҳмудовнинг қайд этишича, хорижда АЭСнинг экологик тоза бўлишига жуда қатъий талаблар қўйилади.
«Экологик мониторинг ҳар бир периметрда ҳар бир йўналиш бўйича олиб борилмоқда, бу АЭС атрофидаги бир неча километр майдонни ҳам ўз ичига олади. АЭС қурилганидан сўнг экологик вазият янада яхшиланади», — деди у.
«Ўзатом» раҳбари бу сўзларига далил сифатида Украинадаги Хмелницкий АЭС таҳлил лабораториялари бошқа ишлаб чиқариш объектларининг сувга оқизаётган чиқиндиларини аниқлашга имкон берганини келтирди.
Унинг қўшимча қилишича, Тузкон кўлининг суви АЭС реакторларини совитиш учун етади. «Бундай ҳисоб-китоблар олиб борилмоқда ва биз совитишнинг турли вариантларини кўриб чиқяпмиз», — дея аниқлик киритди Жўрабек Мирзамаҳмудов.
Изоҳ (0)