Bugun, 28-iyun kuni Axborot va ommaviy kommunikatsiyalar agentligida O‘zbekistonning neft-gaz siyosati muammolari va istiqbollari, shuningdek, aholini energiya manbaalari bilan ta’minlash mavzusida matbuot anjumani bo‘lib o‘tdi. Bu haqda “Daryo” muxbiri Sevara Nishonova xabar berdi.
Tadbirda O‘zbekiston Energetika vazirligi, “O‘zbekneftgaz” AJ, “O‘zatom” agentligi vakillari ishtirok etdi hamda jurnalistlarni qiziqtirgan savollarga javob berdi.
21-iyun kuni bo‘lib o‘tgan Senatning 20-ayalpi majlisida O‘zbekiston Prezidenti Shavkat Mirziyoyev “Lukoyl” kompaniyasidan 600 million dollar miqdoridagi qarzdorlik haqida gapirgan edi.
Matbuot anjumanida ishtirok etgan “O‘zbekneftgaz” AJ boshqaruv raisi Bahodir Siddiqov ushbu holatga quyidagicha izoh berdi:“ ‘Lukoyl’ oldidagi qarz bir yil ichida paydo bo‘lmaganini ta’kidlamoqchiman. Biz keyingi yillarda ‘Lukoyl’ga sotilgan tabiiy gazdan ichki iste’molchilar uchun sotib olamiz. Bu tabiiy gaz iste’moli aholi tomonidan ham, mamlakatimiz rivoji uchun bugungi kunda tashkil etilayotgan yangi korxonalar tomonidan ham tabiiy gaz iste’moli oshishi bilan bog‘liq.
Bugungi kunda gap imzolangan bitim mamlakat manfaatlariga mos kelish-kelmasligi haqida emas. Vujudga kelgan qarz ‘Lukoyl’ bilan mahsulotni bo‘lib olish to‘g‘risidagi bitim doirasida kompaniya operatori bilan loyiha bo‘yicha uch oylik tabiiy gaz qazib olish hajmini tashkil etadi.
Bu qarzdorlikni bartaraf etish bo‘yicha aniq chora-tadbirlarga egamiz. Hozirda ‘Lukoyl’ kompaniyasi bilan qarzdorlikning ushbu qismini restrukturizatsiya qilish va uni kelgusi davrlarda to‘lash bo‘yicha kelishuvga egamiz. Bundan tashqari, mahsulotni bo‘lib olish to‘g‘risidagi bitim doirasida qazib olinayotgan gaz eksportga yo‘naltirilishiga ko‘proq e’tibor qaratishimiz lozim.
Prezidentimiz oldimizga shunday vazifani qo‘ygan va biz buni to‘la-to‘kis anglab turibmiz. Bugungi kunda ‘O‘zbekneftegaz’ning barcha sa’y-harakati o‘z qazib olish hajmini oshirishga, kelgusida bu gaz ichki iste’molchilarga sotilishiga yo‘l qo‘ymaslikka qaratilgan. Chunki sotib olish va sotish narxi orasida farq bor va mahsulotni bo‘lib olish to‘g‘risidagi bitim doirasida barcha qazib olingan gaz eksport qilinishi shartiga amal qilinsa, bu O‘zbekiston uchun ham daromadli loyihadir hamda ‘Lukoyl’ning daromadlar bo‘yicha talabiga ham mos keladi.
Bitim milliy manfaatlarga mos keladimi-yo‘qmi degan savolni qo‘yish noto‘g‘ri deb o‘ylayman. Chunki ‘Lukoyl’ bilan mahsulotni bo‘lib olish to‘g‘risidagi bitim doirasida davlat uch yarim milliard dollar atrofida daromad ko‘rmoqda. Ya’ni davlat soliqlar, daromadli mahsulotdan ulush olish ko‘rinishida o‘z ulushini olmoqda. Davlat bugungi kunda uch yarim milliard dollar daromad oldi, shu bois bitim milliy manfaatlarga mos kelmaydi deyish noto‘g‘ri bo‘lardi”.
Ma’lumot uchun, mart oyida O‘zbekiston “Lukoyl”dan 2018-yilda gaz yetkazib bergani uchun 600 million dollarga yaqin qarz bo‘lib qolgani haqida xabar berilgan edi.
“Lukoyl”ning qazib olish bo‘yicha katta vitse-prezidenti Azat Shamsuarov qarzdorlik mahsulotni bo‘lishib olish to‘g‘risidagi kelishuvda qazib olingan gaz to‘liq eksport qilinishi ko‘zda tutilgan bo‘lsa ham, O‘zbekiston qazib olingan gazning bir qismini ichki bozorga olib qolgani sababli vujudga kelganini ma’lum qilgandi.
Izoh (0)