Davlat xavfsizlik xizmati xodimlari tomonidan o‘tkazilgan tezkor tadbir davomida Surxondaryo viloyatining Denov tumaniga ketayotgan Nexia rusumli avtomashina Qashqadaryo viloyati, Chiroqchi tumanidagi “Umakay” postida to‘xtatildi. Mashina ko‘zdan kechirilganda, uning yukxonasida 10 ming dona “Tramadol” tabletkasi borligi aniqlandi.
Ushbu giyohvandlik vositalari mazkur mashinada yo‘lovchi sifatida ketayotgan fuqarolar — Denov shahrida yashovchi Zarifjon Yo‘ldoshev va Jahongir Bozorovga tegishli bo‘lib, ular mazkur tabletkalarni Qo‘qon shahrida 30 million so‘mga sotib olgani ma’lum bo‘ldi.
Bu kabi qonun buzilishlari Qoraqalpog‘iston Respublikasida ham kuzatildi. Jumladan, To‘rtko‘l tumanida yashovchi Oybek Yo‘ldoshev 1300 dona “Tramadol”ni 9 million 100 ming so‘mga, Ibrohim Kamalboyev esa 1200 dona “Tramadol”ni 7 million 200 ming so‘mga sotayotganda ushlandi.
Bundan tashqari, olingan tezkor ma’lumotlar asosida Nukus shahrida yashovchi Maksetbay Tnibayevning buyumlari ko‘zdan kechirilganda, ularning orasida 2033 dona “Tramadol“ tabletkasi borligi aniqlandi, shuningdek, uning uyidan yana 647 ta shu turdagi tabletkalar topildi.
Shunga o‘xshash holat Xorazm viloyatida ham aniqlandi. Xususan, Bog‘ot tumani, “Obod” mahallasida yashovchi Kamol Kuvakov tanishi Doniyor Yo‘ldoshev bilan o‘zaro til biriktirib, 58 dona “Tramadol” tabletkasini 720.000 so‘mga sotayotgan vaqtida ushlandi.
Shuningdek, ushbu tumandagi “Nurli maskan” mahallasida yashovchi Azimboy Allaberganovning xonadoni ko‘zdan kechirilganda 530 dona “Tramadol” tabletkasi topildi.
Hozirda barcha holatlar yuzasidan tegishli chora-tadbirlar ko‘rilmoqda.
Izoh (0)