Ijtimoiy tarmoqlar orqali Surxondaryo viloyatining Denov tumanida istiqomat qiluvchi Turdixon Kenjayeva hamda Maqsuda Boboyevaning og‘ir ijtimoiy ahvolda ekani haqida ma’lumot va video tarqalgan edi.
Ushbu masala yuzasidan oydinlik kiritish maqsadida Xotin-qizlar qo‘mitasi vakillari Toshkent shahar “Mehr saxovat uyi” reabilitatsiya markazi muayyan yashash joyiga ega bo‘lmagan shaxslarning huquqlari, erkinliklari va qonuniy manfaatlarini himoya qilish, shuningdek, ularni reabilitatsiya qilish, ijtimoiy qo‘llab-quvvatlash va bandligini ta’minlash markazi rahbari, podpolkovnik Bahodir Dushayev ishtirokida Turdixon Kenjayeva hamda Maqsuda Boboyeva bilan muloqot qildi.
Ma’lum bo‘lishicha, 1978-yilda Denov tumanida tug‘ilgan T. Kenjayeva og‘ir ijtimoiy muammolar girdobiga tushib qolgan. O‘zi va farzandlari bir necha bor fuqaroviy eri T.O. tomonidan ma’naviy va jismoniy zo‘ravonliklarga duch kelgan. Hozirda Toshkentdagi “Mehr-sahovat uyi” reabilitatsiya markazida yashab kelmoqda.
Markazda istiqomat qilayotgan M. Boboyeva ham xuddi Kenjayeva singari oilaviy muammolar tufayli ikki yil burun ota uyidan chiqib ketgan va hanuz turli joylarda yashab kelmoqda. Denov tuman hokimi unga vaqtincha yashash uchun 2018-yilda eski maktab binosidan xona ajratib bergan, ammo joy ayolni qoniqtirmaganligi uchun rad etgan.
Qo‘mita rahbariyati ushbu masala bo‘yicha Denov tumani hokimi bilan suhbatlashdi hamda ayollarning qonuniy manfaatlarini ta’minlash bo‘yicha chora-tadbirlar ko‘rildi. T. Kenjayevaga Denov tumanidagi “Namuna” MFYda 2 sotix yer maydoni ajratilib, homiylar yordamida uy-joy qurib berishga kelishildi.
Shuningdek, M. Boboyevaga ham tuman hokimligi tomonidan o‘rnatilgan tartibda xonadon ajratish bo‘yicha kafolat xati taqdim etilgan.
Mazkur masala Xotin-qizlar qo‘mitasi nazoratiga olingan.
Izoh (0)