20 yildan beri qidiruvda bo‘lib, boshqa davlat pasportidan foydalanib kelgan jinoyatchi O‘zbekistonga qaytarildi

2019-yil 10-yanvarda Shavkat Mirziyoyev Xavfsizlik kengashi yig‘ilishida ayrim jinoyatlar ochilmay qolayotganini tanqid qilgan, jazosiz qolayotgan bunday shaxslar yana jinoyat sodir qilishi mumkinligini qayd etgan edi. Bu haqda O‘zA xabar bermoqda.

Shundan so‘ng ichki ishlar va prokuratura xodimlari hamkorligida qator tadbirlar o‘tkazilgan. Puxta reja asosida amalga oshirilgan operatsiyalar natijasida avval ochilmasdan qolgan 791 jinoyat fosh etilgan.

2017-yil 23-iyulda Sirdaryo viloyatining Yangiyer shahrida to‘rt nafar shaxs bosqinchilik jinoyatini amalga oshirib, bir necha fuqaroga katta miqdorda ziyon yetkazgan edi. 24 yoshdan 34 yoshga, deb taxmin qilingan bu shaxslarni aniqlash va topish imkoni bo‘lmagan edi. Olib borilgan keng qamrovli surishtiruv ishlari natijasida bu shaxslarni joriy yil 19-martda fosh etishga erishilgan. Ularning boshqa qator o‘g‘rilik va talonchilik jinoyatlari sodir etgani ham aniqlangan. Hozirda jinoyat ishlari bo‘yicha tergov yakunlanib, sud muhokamasiga yuborilgan.

Amaliyotlar natijasida jinoyat sodir qilib, sud va tergovdan qochib yurgan 1,5 mingdan ortiq shaxs qo‘lga olinib, sud hukmiga havola etildi.

Buxoro viloyatida o‘zlarini huquqni muhofaza qiluvchi organ xodimlarimiz, deb jabrlanuvchini qo‘rqitish yo‘li bilan 500 ming AQSh dollarini olgan noma’lum talonchilarning shaxsi aniqlanib, qidiruvga berilgan edi. Operativ xodimlarning mohirona o‘tkazgan tezkor tadbirlari natijasida Rossiya Federatsiyasi IIV xodimlari hamkorligida jinoyat sodir qilgan shaxslar Rossiyaning Qozon shahrida qo‘lga olinib, shu yil fevral oyida O‘zbekistonga olib kelindi.

Giyohvand moddalar bilan bog‘liq jinoyatlari uchun 13 yildan buyon qidiruvda bo‘lgan Murodali Madaliyev, 20 yildan buyon qidiruvda bo‘lib, Tojikiston fuqarosi pasportidan foydalangan O‘zbekiston fuqarosi Ulug‘bek Jamalov, 13 yildan buyon bosqinchilik jinoyati uchun qidiruvda bo‘lib, Qirg‘iziston  fuqarosi pasportidan foydalanib yurgan O‘zbekiston fuqarosi Axtam Tangliyev Rossiya Federatsiyasining turli shaharlarida qo‘lga olinib, O‘zbekistonga olib kelindi.