ДХХ Қашқадарё, Хоразм ва Қорақалпоғистонда гиёҳванд моддалар савдосига қарши тадбирлар ўтказди

Давлат хавфсизлик хизмати ходимлари томонидан ўтказилган тезкор тадбир давомида Сурхондарё вилоятининг Денов туманига кетаётган Nexia русумли автомашина Қашқадарё вилояти, Чироқчи туманидаги «Умакай» постида тўхтатилди. Машина кўздан кечирилганда, унинг юкхонасида 10 минг дона «Трамадол» таблеткаси борлиги аниқланди.

Ушбу гиёҳвандлик воситалари мазкур машинада йўловчи сифатида кетаётган фуқаролар — Денов шаҳрида яшовчи Зарифжон Йўлдошев ва Жаҳонгир Бозоровга тегишли бўлиб, улар мазкур таблеткаларни Қўқон шаҳрида 30 миллион сўмга сотиб олгани маълум бўлди.

Бу каби қонун бузилишлари Қорақалпоғистон Республикасида ҳам кузатилди. Жумладан, Тўрткўл туманида яшовчи Ойбек Йўлдошев 1300 дона «Трамадол»ни 9 миллион 100 минг сўмга, Иброҳим Камалбоев эса 1200 дона «Трамадол»ни 7 миллион 200 минг сўмга сотаётганда ушланди.

Бундан ташқари, олинган тезкор маълумотлар асосида Нукус шаҳрида яшовчи Максетбай Тнибаевнинг буюмлари кўздан кечирилганда, уларнинг орасида 2033 дона «Трамадол« таблеткаси борлиги аниқланди, шунингдек, унинг уйидан яна 647 та шу турдаги таблеткалар топилди.

Шунга ўхшаш ҳолат Хоразм вилоятида ҳам аниқланди. Хусусан, Боғот тумани, «Обод» маҳалласида яшовчи Камол Куваков таниши Дониёр Йўлдошев билан ўзаро тил бириктириб, 58 дона «Трамадол» таблеткасини 720.000 сўмга сотаётган вақтида ушланди.

Шунингдек, ушбу тумандаги «Нурли маскан» маҳалласида яшовчи Азимбой Аллабергановнинг хонадони кўздан кечирилганда 530 дона «Трамадол» таблеткаси топилди.

Ҳозирда барча ҳолатлар юзасидан тегишли чора-тадбирлар кўрилмоқда.