Said-Abdulaziz Yusupovga nisbatan u rahbarlik qilgan O‘zbekiston bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondining 270 million so‘m pul mablag‘larini o‘zlashtirish aybi ilgari surilmoqda. Bu haqda 17-iyun kuni Axborot va ommaviy kommunikatsiyalar agentligida o‘tgan jurnalistlar bilan muloqotda O‘zbekiston bosh prokurori o‘rinbosari Erkin Yo‘ldoshev ma’lum qildi.
Said-Abdulaziz Yusupov 10-may kuni Jinoyat kodeksining 168-moddasi 4-qismi “a” bandida nazarda tutilgan jinoyatni (juda ko‘p miqdorda firibgarlik) sodir etganlikda gumon qilinib ushlangan va DXX tergov hibsxonasiga joylashtirilgan edi. 12-may kuni DXX Tergov boshqarmasi tomonidan u jinoyat ishida ayblanuvchi tariqasida ishtirok etishga jalb qilinib, unga nisbatan qamoq tarzidagi ehtiyot chorasi qo‘llanilgan.
Bosh prokuror o‘rinbosari Erkin Yo‘ldoshevning ma’lum qilishicha, Said-Abdulaziz Yusupov firibgarlik yo‘li bilan o‘zlashtirgan pulini qaytarish maqsadida o‘z mansabini suiiste’mol qilib, fondning ko‘p miqdordagi mablag‘ini talon-taroj qilgan.
Bu jinoyat ishiga bo‘lgan qiziqishni hisobga olib, yangi tafsilotlardan birini aytmoqchiman. Yusupov Jinoyat ishlari bo‘yicha Mirzo Ulug‘bek tuman sudining 2018-yil 26-avgustdagi hukmiga ko‘ra, 2014-yilning iyun oyida fuqaro Kanyazovaga o‘zini Milliy xavfsizlik xizmati (hozirgi Davlat xavfsizlik xizmati — tahr.) xodimiman, deb tanishtirib, unga Turkiyadan tibbiyot jihozlarini yetkazib berishini aytib, 240 million so‘m pulini firibgarlik yo‘li bilan qo‘lga kiritganligi uchun sudlangan. Hozirgi tergov jarayonida mana shu holat bilan bog‘liq yangi tafsilotlar aniqlandi.Avvalroq Said-Abdulaziz Yusupov tergov davomida qiynoqqa solingani haqidagi xabarlar Bosh prokuratura tomonidan rad etilgan edi.Yusupov ushbu jinoyat bo‘yicha yetkazilgan 240 million so‘m zararni qoplash uchun, mansabini suiiste’mol qilib, o‘zi rahbarlik qilib turgan O‘zbekiston bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondiga aniq maqsadlar uchun va ommaviy axborot vositalari sohasi xodimlarini qo‘llab-quvvatlash uchun ajratilgan 270 million so‘m pul mablag‘larini o‘zlashtirish yo‘li bilan talon-taroj qilib, shu mablag‘larni turli xo‘jalik yurituvchi subyektlarga o‘tkazish orqali, sudlanayotgan ish bo‘yicha zararni qoplashga yo‘naltirgan.
Hozirda fondning moliyaviy faoliyati bo‘yicha taftish o‘tkazilmoqda.
Erkin Yo‘ldoshev, bosh prokuror o‘rinbosari
Izoh (0)