15 июнь куни эрталаб ижтимоий тармоқларда Андижон шаҳридаги 1-кичик даҳа, «Ёйилма» маҳалласи ҳудудидаги тўрт қаватдан иборат 1-уйнинг том қисмида содир бўлган ёнғин тўғрисида видеолавҳалар пайдо бўлди. Ушбу воқеа юзасидан «Дарё» мухбири воқеа жойига бориб, журналистик суриштирув олиб борди.
Шаҳар ҳокимлиги берган маълумотларга, мазкур уй 6 та подезд, 64 хонадондан иборат бўлиб, 180 нафардан ортиқ аҳоли истиқомат қилади. Бино 1972 йилда қуриб битказилган, ўтган йили таъмирлаш ишлари олиб борилган.
Жамила Отабоева шу уйдаги хонадонлардан бирида истиқомат қилади. Ёнғиндан илк хабардор бўлганлардан бири.
— Бугун дам олиш куни бўлганлиги сабабли, эрталабдан фарзандим билан пастдаги гулхонани ободонлаштиришга киришган эдик, — дейди Жамила Отабоева. — Бир пайт турли овозлар эшитила бошланди. Қаердан келаётганини билиш учун атрофга разм солдим. Дастлаб ҳеч нарсани пайқамадик. Том тарафга қараганимда бурқсаб тутун чиқаётганини кўриб қолдим. Қора тутун бутун уйни қамраб олганди. Вақтдан ютказмаслик учун дарҳол ёнғин хавфсизлиги хизматига қўнғироқ қилдим. Қўшниларни хабардор қилишга интилдим. Бу орада ўт ўчирувчиларнинг бир қисми етиб келди. Кейин ўнга яқин машиналар қўшилди. Ёнғин алангага айланиб улгурганлиги учун тинимсиз сув сепишарди. Ярим соатлар чамаси қилинган ҳаракат натижасида ёнғин бартараф этилди.
— Уйимизининг томида ёнғин чиққанини эшитиб шок ҳолатга тушиб қолдик, - дейди ушбу уйда яшовчи «Аслзода» ширкати раиси Муҳаббатхон Қодирова. — Орамизда катта ва кичик ёшдагилар бор эмасми, эшитиб ҳушидан кетганлар ҳам бўлди. Тез ёрдам машиналари зудлик билан етиб келиб мурожаат қилганларга биринчи тиббий ёрдамни кўрсатди. Энг асосийси, ҳеч ким ҳеч қандай талофат кўрганлар йўқ, қурбонлар бўлмади. Олов хонадонларга туташмагани ҳам бизни бахтимиз, десам адашмайман. Ёнғинни ўчириш давомида Андижон шаҳри ҳокими биз билан суҳбат ўтказиб, сабрли бўлишимизни сўради.
Фавқулодда вазиятлар бошқармаси ёнғин хавфсизлиги бошқармаси бошлиғи, подполковник Жасурбек Каримовнинг маълум қилишича, ёнғин электр симининг қисқа туташувидан келиб чиққани тахмин қилинмоқда. Унинг натижасида 500 квадрат метр том қисми зарар кўрган.
– Ушбу ҳодиса юзасидан зудлик билан ишчи гуруҳ ташкил қилинди ва барча подездларда ўрганишлар бошлаб юборилди, — дейди Жасурбек Каримов. — Айни пайтда хонадонларга биттама-битта кирилиб электр ва газ тизимларининг соз ёки носозлиги текширилмоқда. Шунингдек, фуқароларга хавфсизлик қоидаларига риоя этишлари бўйича тушунтириш ишлари олиб борилмоқда.
Андижон шаҳри ҳокими Дилмурод Раҳматуллаевга кўра, бахтсиз ҳодиса ва уни натижасида етказилган моддий зарарни аниқлаш бўйича ҳокимлик томонидан махсус ишчи гуруҳи тузилган.
— Зарар кўрган жойларни тозалаш ва ободонлаштириш ишларини амалга ошириш учун шаҳар ободонлаштириш бошқармаси ходимлари, ёрдам қўлини чўзишни истаган маҳалла фаоллари ва шу уйда яшовчи ходимлар жалб этилди, — дейди шаҳар ҳокими.
— Ёнғин бартараф этилгач бир соат мобайнида том ёғоч, тунука қолдикларидан тозаланди. Тозалаш ишлари тугагач бу ерда қурувчи ташкилотлар ишни бошлайди. Ҳозирга қадар янги қурилиш материаллари етказиб келинмоқда. Барча харажатлар маҳаллий бюджет ҳисобидан қопланади ва бир ҳафта мобайнида том қайтадан ёпилиб, янгиланади.
Изоҳ (0)