Yaqin Sharqdan qaytarilgan 156 nafar shaxs orasida buxorolik ayollar ham bor. Buxoro viloyati IIB vakilining ma’lum qilishicha, buxorolik ikki ayol bundan uzoq yillar ilgari aldov oqibatida O‘zbekistonda chiqib ketib, og‘ir hayotiy davrni boshdan kechirgan.
1978-yilda tug‘ilgan Kogon tumanilik N.X. va uning 3 nafar voyaga yetmagan farzandi, shuningdek, 1990-yilda tug‘ilgan Buxoro shahrilik M.Z. 12-iyun kuni “Buxoro” temiryo‘l vokzali orqali vohaga olib kelingan.
Ularga tibbiy, psixologik, moddiy va ma’naviy yordam ko‘rsatilgan. O‘zbekiston fuqaroligini tasdiqlovchi biometrik pasport hamda voyaga yetmagan farzandlariga tug‘ilganlik to‘g‘risidagi guvohnoma rasmiylashtirilgan.
— Tan olib aytamanki, yoshlikdagi bevoshliklarim sabab, urush olov purkab turgan jahannamga bilib-bilmay ketib qoldim. Har soniyada azob chekkanlarimni shukr va sabr qilmaganim oqibatida ko‘rdim. U yerda nimalarga majbur qilishmadi, fil balki chidolmasdi bu ko‘rguliklarga.
Suriyada farzandli bo‘ldim. Bolalarim urush ichida o‘sib, ulg‘aydi. O‘qdan qochib, kutilmagan soniyada “o‘lib”qolishi mumkinligidan cho‘chib yashashdi. Ko‘z o‘ngida hali tanasining qaysidir a’zosidan ajralgan yoki oyog‘i tagida “gup” etib tushgan qonli jasadlar orasida asablari kirtayib, yoshiga nisbatan jahldor bo‘lib ham ulg‘ayishganini yashirmayman. Achinarlisi, bolalar toshlaru qum-tuproqlar orasida so‘lib-so‘lg‘igan o‘t-o‘lanlarni yegulik, deb anglashdi. Non hidi nimaligini, hatto, tinchlik degani qanday tushuncha ekanligini bilmay, kamolga yetgan bolalarim O‘zbekistonni xuddi ertaklar olamiga tushib qolgandek qabul qilishdi. O‘q otishmalaridan xuddi mushuk bolasidek hurkib, bag‘rimga biqinib oladigan farzandlarimni bugun qo‘llaridan ushlab tutolmayman. Ko‘chaga oshiqib chopayotgan, hali o‘qish tugul, harf yoki kitob nimaligini bilmagan o‘smir o‘g‘limning: “Tinchlik, degani zo‘r ekan, nega bizda bunaqasi bo‘lmagan, ona?!” deb hayratomuz so‘raganida yig‘lab yubordim. Menga va men kabi jabrdiyda ayollarga, norasida farzandlarimizga bag‘ir ochgan, onajon-davlatimizga, gunohu xatolarimizni kechirgan elu-ko‘yga ming-ming rahmat. Umrimning oxirigacha duodaman, — dedi N.X.
Buxoro viloyati hokimligi, mutasaddi idora va tashkilot vakillari Yaqin Sharqdan qaytgan ayollarning ijtimoiy hayotga moslashuvlari borasida sa’y-harakat ko‘rsatmoqda. Ayni paytda bu ikki nafar ayolning farzandlarini ta’lim va tarbiya muassasalariga joylashtirish borasida amaliy ishlar qilinyapti.
Izoh (0)