Qashqadaryo viloyatida 2018–2019-yillarda aholining bandligini ta’minlash va oilaviy tadbirkorlikni rivojlantirish uchun 32 362 ta loyihaga 600,7 milliard so‘m kredit berilgan. Bu haqda 12-iyun kuni bo‘lib o‘tgan “Tadbirkorlik faoliyatini qo‘llab-quvvatlash va himoya qilish masalalarida amalga oshirilgan ishlar sarhisobi” mavzusidagi matbuot anjumanida ma’lum qilindi, deya xabar beradi “Daryo” muxbiri.
Viloyat markaziy banki bosh boshqarmasi boshlig‘i Fayzulla Rajabovning ma’lumot berishicha, o‘tgan 2 yil davomida “Har bir oila — tadbirkor” dasturiga ko‘ra aholining 26 598 ta loyihasiga 453,9 milliard so‘m kredit berilgan bo‘lsa, “Yoshlar kelajagimiz” dasturiga asosan 355 ta loyiha muallifiga 54 milliard so‘m ajratilgan. Aholiga kredit mablag‘lari ajratish borasida viloyat respublikada eng yuqori o‘rinda turibdi.
Fayzulla Rajabovga ko‘ra, imtiyozli kredit ajratilishida asosiy e’tibor kam daromadli oilalarga qaratilgan. Jumladan 11 039 ta kam daromadli oilaga 40,3 milliard so‘mlik mikrokreditlar berilgan.
Shuningdek, Shahrisabz shahrida bo‘lib o‘tgan “Maqom” festivali oldidan 58 nafar fuqaroga uy-mehmonxona tashkil etish uchun 1,4 milliard so‘m, Chiroqchi tumanining Ko‘kdala hududida eksportbop tarvuz yetishtirish uchun 367 nafar fuqaroga 1,2 milliard so‘m, aholi xonadonlarida baliqchilikni rivojlantirish uchun 107 nafar fuqaroga 2,7 milliard so‘m kredit mablag‘lari berilgan.
Tadbirda so‘z olgan jurnalistlar bugungi kunda “Har bir oila — tadbirkor” dasturiga ko‘ra, aholiga shuncha mablag‘ berilgan bo‘lsa-da, natija bilan maqtagulik emasligini, qolaversa aksariyat banklarda kredit so‘rab borganlarga “limit” tugagan degan vaj ko‘rsatilayotganini tanqid qildi.
Shuningdek, aholining issiqxona qurishi uchun bankdan olayotgan kredit mablag‘lari yetmay qolish holatlari kuzatilayotgani, boisi mahalliy quruvchilar narxni sun’iy tarzda oshirib yuborganligi, vodiy viloyatlaridan kelgan quruvchilar bilan kelishilganda, olingan kredit mablag‘lari hisobidan ularning hisob raqamlariga pul o‘tkazish imkoniyati yo‘qligi ro‘kach qilinayotgani ko‘pchilikni o‘ylantirayotgani aytib o‘tildi.
Savollarga javoban viloyat markaziy banki bosh boshqarmasi boshlig‘i Fayzulla Rajabov agar shunday holat aniqlansa, bor pulni bermay turish holatlari kuzatilayotgan bo‘lsa, tegishli chora qo‘llanilishini aytib, bunday holatlarni oshkor qilishda jurnalistlardan yordam kutishini bildirdi.
Izoh (0)