Яқин Шарқдан қайтарилган 156 нафар шахс орасида бухоролик аёллар ҳам бор. Бухоро вилояти ИИБ вакилининг маълум қилишича, бухоролик икки аёл бундан узоқ йиллар илгари алдов оқибатида Ўзбекистонда чиқиб кетиб, оғир ҳаётий даврни бошдан кечирган.
1978 йилда туғилган Когон туманилик Н.Х. ва унинг 3 нафар вояга етмаган фарзанди, шунингдек, 1990 йилда туғилган Бухоро шаҳрилик М.З. 12 июнь куни «Бухоро» темирйўл вокзали орқали воҳага олиб келинган.
Уларга тиббий, психологик, моддий ва маънавий ёрдам кўрсатилган. Ўзбекистон фуқаролигини тасдиқловчи биометрик паспорт ҳамда вояга етмаган фарзандларига туғилганлик тўғрисидаги гувоҳнома расмийлаштирилган.
— Тан олиб айтаманки, ёшликдаги бевошликларим сабаб, уруш олов пуркаб турган жаҳаннамга билиб-билмай кетиб қолдим. Ҳар сонияда азоб чекканларимни шукр ва сабр қилмаганим оқибатида кўрдим. У ерда нималарга мажбур қилишмади, фил балки чидолмасди бу кўргуликларга.
Сурияда фарзандли бўлдим. Болаларим уруш ичида ўсиб, улғайди. Ўқдан қочиб, кутилмаган сонияда «ўлиб»қолиши мумкинлигидан чўчиб яшашди. Кўз ўнгида ҳали танасининг қайсидир аъзосидан ажралган ёки оёғи тагида «гуп» этиб тушган қонли жасадлар орасида асаблари киртайиб, ёшига нисбатан жаҳлдор бўлиб ҳам улғайишганини яширмайман. Ачинарлиси, болалар тошлару қум-тупроқлар орасида сўлиб-сўлғиган ўт-ўланларни егулик, деб англашди. Нон ҳиди нималигини, ҳатто, тинчлик дегани қандай тушунча эканлигини билмай, камолга етган болаларим Ўзбекистонни худди эртаклар оламига тушиб қолгандек қабул қилишди. Ўқ отишмаларидан худди мушук боласидек ҳуркиб, бағримга биқиниб оладиган фарзандларимни бугун қўлларидан ушлаб тутолмайман. Кўчага ошиқиб чопаётган, ҳали ўқиш тугул, ҳарф ёки китоб нималигини билмаган ўсмир ўғлимнинг: «Тинчлик, дегани зўр экан, нега бизда бунақаси бўлмаган, она?!» деб ҳайратомуз сўраганида йиғлаб юбордим. Менга ва мен каби жабрдийда аёлларга, норасида фарзандларимизга бағир очган, онажон-давлатимизга, гуноҳу хатоларимизни кечирган элу-кўйга минг-минг раҳмат. Умримнинг охиригача дуодаман, — деди Н.Х.
Бухоро вилояти ҳокимлиги, мутасадди идора ва ташкилот вакиллари Яқин Шарқдан қайтган аёлларнинг ижтимоий ҳаётга мослашувлари борасида саъй-ҳаракат кўрсатмоқда. Айни пайтда бу икки нафар аёлнинг фарзандларини таълим ва тарбия муассасаларига жойлаштириш борасида амалий ишлар қилиняпти.
Изоҳ (0)