O‘zbekiston Bosh prokuraturasi Davlat xavfsizlik xizmati (DXX)ning sobiq raisi Ixtiyor Abdullayevga nisbatan jinoyat ishi qo‘zg‘atilganini rasman tasdiqladi (avvalroq, 2019-yil may oyida Abdullayevning “poraxo‘rlik botqog‘iga botgani” haqida maqolalar e’lon qilingan edi).
Xabar berishlaricha, jinoyat ishi bo‘yicha DXXning sobiq birinchi o‘rinbosari Jahongir Egamov, avval qo‘lga olingan O‘zbekiston Oliy sudi raisi o‘rinbosari — ma’muriy ishlar bo‘yichat sudlov hay’ati raisi Bahodir Dehqonov va boshqalar — jami 10 ga yaqin odam tergov qilinmoqda.
“Mansab vakolatlarini suiiste’mol qilish, poraxo‘rlik bilan bog‘liq sodir etilgan jinoyatlar yuzasidan Davlat xavfsizlik xizmatining sobiq rahbarlari Ixtiyor Abdullayev, Jahongir Egamov va boshqa 10 ga yaqin mansabdorlarga nisbatan jinoyat ishi qo‘zg‘atilgan. Hozirgi vaqtda tergov harakatlari olib borilmoqda. Mansabdorlar orasida Bahodir Dehqonov ham bor”, — deya bosh prokuror o‘rinbosari Erkin Yo‘ldoshevning so‘zlaridan iqtibos keltirmoqda “Gazeta.uz”.
Ismlari keltirilgan shaxslarga nisbatan sodir etgan jinoyatlaridan kelib chiqib, ehtiyot choralari ko‘rilgan.
Ma’lumot uchun, 2018-yil yanvarida DXX (MXX) rahbari etib tayinlangan (ushbu lavozimda xizmatga 1995-yildan beri rahbarlik qilgan Rustam Inoyatovni almashtirgan edi), 2019-yil fevralida esa o‘z xohishiga DXX raisligidan ketgan edi.
Uning lavozimdan ozod qilinishi salomatligi bilan bog‘liq, deb aytilgan edi. Xususan, keyingi bir yil davomida bo‘yin va bel umurtqa pog‘onasida ikki marta og‘ir jarrohlik amaliyotini o‘tkazgani, shuningdek, ko‘zi ham operatsiya qilingani ta’kidlangan edi.
Ixtiyor Abdullayev 2015-yildan 2018-yilga qadar O‘zbekiston bosh prokurori, 2009-yildan 2015-yilga qadar esa Prezident davlat maslahatchisi sifatida ishlagan.
Bahodir Dehqonov 2017-yil may oyidan beri Oliy sud raisi o‘rinbosari — ma’muriy ishlar bo‘yicha sudlov hay’ati raisi lavozimida ishlab kelayotgan edi. Bungacha u Oliy xo‘jalik sudi raisi o‘rinbosari sifatida faoliyat olib borgan. 2019-yil fevralida u xizmat xonasida qo‘lga olingani xabar qilingan edi.
Izoh (0)