Turizmni rivojlantirish davlat qo‘mitasi raisi v.v.b. Abdulaziz Aqqulov “Jahonning eng peshqadam 500 nafar musulmon kishisi” reytingidan o‘rin olgan Buyuk Britaniya jamoat arbobi Ahmad Salim bilan O‘zbekistonni islom madaniyati beshigi sifatida xalqaro miqyosda targ‘ib qilishga doir kelishuvga erishdi. Bu haqda Turizmni rivojlantrish qo‘mitasi matbuot xizmati xabar berdi.
Qo‘mita O‘zbekistonning ziyorat turizm salohiyatini keng targ‘ib qilish maqsadida xalqaro tashkilotlar bilan o‘zaro aloqalarni tizimli ravishda mustahkamlamoqda. 13-iyun kuni Turizmni rivojlantirish davlat qo‘mitasi taklifiga binoan Ahmad Salim O‘zbekistonga tashrif buyurdi.
Turizmni rivojlantirish davlat qo‘mitasida tashkillashtirilgan uchrashuvda qo‘mita raisi v.v.b. Abdulaziz Aqqulov xorijlik mehmonga bugungi kunda mamlakatda turizmni rivojlantirish, ayniqsa, ziyorat turizmi yo‘nalishida har tomonlama hamkorlik qilishga tayyor ekanini ta’kidladi.
Ahmad Salim qabul va taqdim etilgan foydali ma’lumotlar uchun Abdulaziz Aqqulovga minnatdorchilik bildirdi hamda tashrifidan asosiy maqsad - ikki tomonlama hamkorlik aloqalarini o‘rnatish, dunyo madaniyati, ilm-fan va san’ati rivojiga turtki bergan, sivilizatsiyalar chorrahasida joylashgan O‘zbekistonning ma’rifiy-madaniy merosini o‘rganish va jahonda munosib targ‘ib qilishga doir loyihalarni amalga oshirish ekanligini tasdiqladi.
“1001 Inventions” vakili Buxoro shahrining 2020-yilda “Islom madaniyati poytaxti” deb e’lon qilinishi munosabati bilan Buxoroda o’tadigan tadbirlarni xalqaro miqyosda tashkil etishda Turizmni rivojlantirish davlat qo‘mitasi bilan hamkorlikda loyihalarni amalga oshirishga tayyor ekanini bildirdi.
Ma’lumot uchun: Ahmad Salim “1001 Inventions” tashkilotining prodyuseri va boshqaruv direktori sifatida dunyo miqyosida ta’lim va ijtimoiy sohalarda jahon sivilizatsiyasi rivojida Islom madaniyatining tutgan o‘rniga bag‘ishlangan ko‘plab muvaffaqiyatli loyihalarni amalga oshirgan va ushbu loyihalari orqali millionlab kishilarning e’tiborini qozongan.
“1001 Inventions” tashkiloti BMT, UNESCO va jahonning ko‘zga ko‘ringan muzeylarida turli tadbirlarni o‘tkazadi. Uning gollivudlik mashhur aktyor Ben Kingsley ishtirokidagi “1001 kashfiyot va sirlar kutubxonasi” nomli qisqa metrajli filmi bugungi kunga qadar 100 milliondan ortiq kishi tomonidan tomosha qilingan bo‘lib, Kann festivali kabi xalqaro festivallarning 27 ta oltin va gran-pri sovrinlarini qo‘lga kiritgan.
Ta’kidlash joizki, Ahmad Salim shuningdek britaniyalik mashhur xonanda, diniy qo‘shiqlari bilan dunyo musulmonlari orasida shuhrat qozongan Sami Yusufni “ETM International and Andante Studios” tashkiloti prodyuseri va direktori sifatida qo‘llab keladi.
Izoh (0)